ފިނޭންސް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި ޝަފީގް ވިދާޅުވީ މި ސަރުކާރު ވެރިކަމާއި ހަވާލުވިއިރު ރާއްޖޭގެ މާލީ ހާލަތު އޮތީ ވަރަށް ދަށަށް ގޮސްފައި ކަމަށެވެ. ނަމަވެސް މިދިޔަ ހަ މަސް ދުވަހުގެ ތެރޭގައި ކުރެވުނު މަސައްކަތްތަކާ އެކު ބޮޑެތި ކުރިއެރުންތަކެއް ހޯދިފައިވާ ކަމަށް ޝަފީގް ވިދާޅުވިއެވެ.
ޝަފީގް ވިދާޅުވެފައި ވަނީ މީގެކުރިން އެތައް ސަތޭކަ މިލިއަން ޑޮލަރެއް ހުރި ސޮވެރިން ފަންޑުގައި ސަރުކާރާއި ހަވާލުވިއިރު ހުރީ އެންމެ ދެ މިލިއަން ޑޮލަރު ކަމަށެވެ. އެހެންނަމަވެސް ވޭތުވެދިޔަ ހަ މަސް ދުވަހުގެ ތެރޭގައި ކުރެވުނު މަސައްކަތުން އެ ފަންޑު 50 މިލިއަން ޑޮލަރަށް އިތުރުކުރެވިފައިވާ ކަމަށް މިނިސްޓަރު ވިދާޅުވި އެވެ.
ޝަފީގް ވިދާޅުވީ މި އަހަރު ނިމޭއިރު ސޮވެރިން ފަންޑު 100 މިލިއަން ޑޮލަރަށް އިތުރުކުރުމަކީ އަމާޒެއް ކަމުގަ އެވެ.
މި ފަންޑަކީ ތަރައްގީގެ މަޝްރޫއުތައް ހިންގުމަށް ނަގާ ލޯނު ދެއްކުމުގެ ގާބިލުކަން ހޯދުމަށާއި ނަގާ ދަރަނި އަދާކުރުމުގައި އިގުތިސާދަށް އަތުވެދާނެ ލޮޅުމަކުން ލިބޭ ގެެއްލުން ފޫބެއްދުމަށް ކުރީގެ ރައީސް އަބްދުﷲ ޔާމީންގެ އެޑްމިނިސްޓްރޭޝަނުގައި 2017 ވަނަ އަހަރު އުފެއްދި ފަންޑެކެވެ. ކޮވިޑާ އެކު ރާއްޖެއަށް އާމްދަނީ ލިބުން ހުއްޓުމާ ގުޅިގެން ކުރީގެ ރައީސް އިބްރާހިމް މުހައްމަދު ސޯލިހުގެ އެޑްމިނިސްޓްރޭޝަނުގައި ސޮވެރިން ފަންޑުގައި ހުރި ޑޮލަރުތައް ވަނީ މާރުކޮށްފަ އެވެ.
