އޮލިމްޕިކް ކޮމިޓީގެ ރައީސްކަންވެސް ކުރައްވާ، ޗަމްޕީ، އަހަރެއްގެ ތެރޭ ސްވިމިން ޕޫލްގެ މަސައްކަތް ނިންމަވާލައްވަން ބޭނުން ކަމަށް ވިދާޅުވީ، ސްވިމިން އެސޯސިއޭޝަން އޮފް މޯލްޑިވްސްގެ ރައީސްގެ މަގާމަށް ހަތަރު ވަނަ ދައުރަކަށް އިންތިހާބުވުމަށް ފަހު، ވާހަކަ ދައްވަމުންނެވެ.
ހުޅުމާލޭގައި ގާއިމްކުރާ ސްވިމިން ޕޫލްގެ ބިން ހަމަޖެހިފައިވާއިރު، އެ ޕޫލުގެ މަސައްކަތް މިހާރު އަންނަނީ ކުރަމުންނެވެ. ޗަމްޕީ ވިދާޅުވީ، އަހަރެއްގެ ތެރޭގައި އެ މަސައްކަތް ނިންމާލަން ބޭނުންވާ ކަމަށެވެ.
"އަހަރެއްގެ ތެރޭގައި މި ބޭނުންވަނީ އެކަން (ޕޫލް) ނިންމާލަން. ނިމިގެންދާއިރު އަޅުގަނޑުމެންނަށް 50 މީޓަރުގެ ޕޫލަކާއި 25 މީޓަރުގެ ހަ ލޭނު ޕޫލެއް ވިތު ޑައިވިން ފެސިލިޓީސް އޮންނާނެ. އޭރަށް އަޅުގަނޑުމެން ޑައިވިން ވެސް އިންޓްރޮޑިއުސް ކުރާނަން،"
ސްވިމިންގެ ރައީސްކަމަށް ޗަމްޕީ އިތުރު ދައުރަކަށް އިންތިހާބުވެވަޑައިގަތީ އިންތިހާބުގައި، އިތުރު ފަރާތަކާ ވާދަކުރުމެއް ނެތި، ފެންނަ ނުފެންނަ ވޯޓުން 96.97 އިންސައްތަ ކާމިޔާބު ކުރައްވައިގެންނެވެ. ސްވިމިންގެ ރައީސްކަމުގައި މިދިޔަ ތިން ދައުރުގައި ހުންނެވި ޗަމްޕީ 2020 ވަނަ އަހަރުގެ ޖުލައި މަހު ބޭއްވި އިންތިހާބު ވެސް ކާމިޔާބު ކުރެއްވީ ހަމައެކަނި ކެންޑިޑޭޓުގެ ހައިސިއްޔަތުން، ނެގި ފެންނަ ނުފެންނަ ވޯޓު ކާމިޔާބު ކުރައްވައިގެންނެވެ.
