"ސީއެންއެމް" އަށް މައުލޫމާތު ދެމުން ފުވާދު ވަނީ މާލީ ބަޔާން ހުށަނާޅާ ކެންޑިޑޭޓުންނާ މެދު ކަންތައް ކުރާނެ ގޮތާއި އަޅާނެ ފިޔަވަޅުތަކާ ގުޅޭ ގޮތުން ވާހަކަދައްކަވާފަ އެވެ.
މީގެ އިތުރުން ކެންޑިޑޭޓުން ހުށަހަޅުއްވާފައި ހުރި ރިޕޯޓްތައް ސައްހަ ރިޕޯޓްތަކަށް ވޭތޯ، އަދި ހިމަނަންޖެހޭ މައުލޫމަތުތައް އެކުލަވާލާފައި ވޭތޯ އިލެކްޝަން ކޮމިޝަންގެ ސްޓާފުން ޗެކްކުރަމުން ގެންދާކަމަށްވެސް ފުވާދު ވިދާޅުވި އެވެ. ގާނޫނުގައި ވާގޮތުގެ މަތިން 6 މަސްދުވަހުގެ ތެރޭގައި ކެންޑިޑޭޓުން ލިޔެކިޔުންތައް ހުށަހަޅަން ޖެހޭކަމަށާއި އެކަން އެފަދައިން ނުވެއްޖެނަމަ ޕްރޮސެކިއުޓާ ޖެނެރަލް އޮފީހުން އެފަރާތްތަަކަށް ދައުވާ ކުރާނެކަަމަށްވެސް ފުވާދު ވިދާޅުވި އެވެ.
އެގޮތުން އިލެކްޝަން ކޮމިޝަނުން އެމަސައްކަތް ވީހާވެސް އަވަހަކަށް ކުރުމަށް މަސައްކަތްކުރަމުން ގެންދާނަމަވެސް މިފަހަރު 2ސަބަބަކާ ހުރެ އެކަން ކުރުމަށް ދަތިތަކަކާ ކުރިމަތިލާން ޖެހިފައިވާކަމަށް ފުވާދު ފާހަގަކުރެއްވި އެވެ.
މީގެ ކުރިން މާލީ ބަޔާންތައް ސަރުކާރުން ބަލައިގަންނަ، ހުއްދަދީފައި އޮންނަ އޮޑިޓަރެއް ޗެކްކުރައްވާ އޮޑިޓްކުރުމަށްފަހު ހުށަހަޅާގޮތައް އޮންނަނަަމަވެސް މަޖިލީހުން އެންމެފަހުން އިންތިހާބުގެ ކުރިން ގެނައި ބަދަލާ ގުޅިގެން އެކަން އުނިވެފައިވާކަަމަށް ފުވާދު ފާހަގަކުރެއްވި އެވެ. އަދި އިލެކްޝަން ކޮމިޝަންގެ ސްޓާފުންގެ އަދަދުވެސް ވަަރަށް މަދުކަމަށާއި އެ މަސައްކަތްތަކާ އެކީގައި އެހެން މަސައްކަތްތަކެއްވެސް ކުރަމުންއަންނަ ކަމަށް ފުވާދު ވިދާޅުވި އެވެ.
މާލީ ބަޔާން ހުށަނާޅައިގެން މިދިޔަ އަހަރުވަނީ ގުރައިދޫ ދާއިރާގެ ބައި-އިލެކްޝަންގައި ވާދަކުރެއްވި ތިން ކެންޑިޑޭޓުން ޖޫރިމަނާކޮށްފަ އެވެ. އޭގެ ތެރޭގައި އެފަހަރު އެ ގޮނޑި ކާމިޔާބުކުރެއްވި އިބްރާހިމް ޝާޒް ވެސް ހިމެނެ އެވެ. ކޮންމެ ކެންޑިޑޭޓެއް ވެސް ޖޫރިމަނާކޮށްފައިވަނީ 6،000ރ. އިންނެވެ.
ފުއާދު ވިދާޅުވީ މި ފަހަރު މާލީ ބަޔާން ހުށަނާޅައި އަދަދަކީ 40 ކެންޑިޑޭޓުން ކަމަށާއި އޭގެތެރޭގައި މިހާރު މަޖިލީހަށް އިންތިހާބުވެފައިވާ އެއްވެސް ކެންޑިޑޭޓެއް ނުހިމެނޭ ކަމަށެވެ.
