"ހިޔަލަ ވީކެންޑް މާކެޓް" އަކީ ދިވެހި އަންހެން ވިޔަފާރިވެރިންނަށް ވިޔަފާރީގެ އިތުރު ފުރުސަތުތަކެއް ފަހިކުރުމުގެ ގޮތުން އިކޮނޮމިކް މިނިސްޓްރީގެ އިސްނެގުމާ އެކު ބީސީސީން ކުރިއަށް ގެންދާ މާކެޓެކެވެ.
ބީސީސީން ބުނީ ހުޅުމާލޭ ކޮންޓެއިނާ ޕާކު ސަރަހައްދުގައި ހިޔަލަ ވީކެންޑް މާކެޓުގެ ނަމުގައި ގާއިމުކޮށްފައިވާ ސަރަހައްދަށް ލިބެމުންދާ ތަރުހީބަށް ބަލައި، އެ ސަރަހައްދުގެ ނަން ހިޔަލަ މާކެޓަށް ބަދަލުކޮށްފައިވާ ކަމަށެވެ. އެ ސަރަހައްދަކީ ވިޔަފާރީގެ ބޭނުމަށް ކޮންމެ ދުވަހަކު ވެސް ހުޅުވާ ތަނެއްގެ ގޮތުގައި މިހާރު ހަމަޖައްސާފައިވާ ކަމަށް ބީސީސީން ބުނެ އެވެ.
ދިވެހި އަންހެން ވިޔަފާރިވެރިންނަށް ވިޔަފާރީގެ އިތުރު ފުރުސަތު ފަހިކޮށްދިނުމުގެ ގޮތުން، އެ ސަރަހައްދުގައި ބެހެއްޓިފައިވާ ކިއޮސްކްތައް އެއް އަހަރު ދުވަހުގެ މުއްދަތަށް ކުއްޔަށް ދޫކުރުމަށް ބީސީސީން ވަނީ ހުޅުވާލާފަ އެވެ. ބީސީސީން ބުނެފައި ވަނީ މި ބަދަލާ އެކު، ކިއޮސްކްތައް މެދުވެރިކޮށް ދިވެހި އަންހެން ވިޔަފާރިވެރިންނަށް ވިޔަފާރި ކުރުމުގެ އިތުރު ފުރުސަތުތައް ފަހިވެ، ވިޔަފާރިތައް އިތުރު ހަރުފަތަކަށް ގެންދިއުމަށް ލިބޭނެ ވަރަށް ބޮޑު ބާރަކަށްވާނެ ކަމަށް އެ ކޯޕަރޭޝަނުން ދެކޭ ކަމަށެވެ.
ހިޔަލަ މާކެޓުގެ ކިއޮސްކްތައް ކުއްޔަށް ހިފުމަށް ޝައުގުވެރިވާ ފަރާތްތަކުން އެކަމަށް އެދި ފޯމު ހުށަހެޅުމުގެ ފުރުސަތު ބީސީސީން ހުޅުވާލާފައި ވަނީ އަންނަ އާދިއްތަ ދުވަހުގެ ހަވީރު 4:00 އާ ހަމައަށެވެ. މިކަމާ ގުޅޭ އިތުރު މައުލޫމާތު 3305555 އަށް ގުޅައިގެން ނުވަތަ [email protected] އަށް އީމެއިލް ކޮށްގެން ލިބޭނެ ކަމަށް ބީސީސީން ބުނެ އެވެ.
