އިތުރު ދައުރަކަށް، ސްވިމިންގެ ރައީސްކަމުގެ މަގާމަށް އިންތިހާބުވެވަޑައިގަތުމަށް ފަހު ޗަމްޕީ ވިދާޅުވީ، ރާއްޖޭގެ ފެތުމަށް އަންނަ ބަދަލާއެކު ސްވިމިން އެސޯސިއޭޝަން އޮފް މޯލްޑިވްސްގެ ނަން މެންބަރުންގެ ލަފަޔާއެކު މޯލްޑިވްސް އެކުއެޓިކްސްގެ ނަމަށް ބަދަލުކުރަންޖެހޭ ކަމަށެވެ.
ސްވިމިންގެ ބައިނަލްއަގުވާމީ ޖަމުއިއްޔާގެ ނަން، އިންޓަރނޭޝަނަލް އެކުއަޓިކްސްއަށްވަނީ ބަދަލުކޮށްފައެވެ. ޗަމްޕީ ވިދާޅުވީ، އެ ގޮތަށް ގިނަ ގައުމުތަކުންވެސް އެކުއަޓިކްސް ހިމެނޭ ގޮތަށް ނަން ބަދަލުކުރަމުން އަންނަ ކަމަށެވެ. އަދި ބައިނަލްއަގުވާމީ ބައެއް ބައްދަލުވުންތަކަށްދާއިރު، ރާއްޖޭގެ ސްވިމިން އެސޯސިއޭޝަނަށް، މޯލްޑިވްސް އެކުއަޓިކްސްގެ ނަމުންވެސް މުހާތިބުކުރާކަން ސައްތާރު ފާހަގަކުރެއްވިއެވެ.
ޗަމްޕީ އިތުރަށް ވިދާޅުވީ، އިންޓަރނޭޝަނަލް އެކުއަޓިކްސްއިން އެދޭ ބައެއް ކަހަލަ ބަދަލުތައް، ސްވިމިން އެސޯސިއޭޝަންގެ ގަވާއިދަށްވެސް ގެންނަން ޖެހޭ ކަމަށެވެ. އަދި އާ ހިންގާ ކޮމިޓީގެ ދައުރު ފެށުމާއެކު، މެންބަރުންނާއެކު ދުރާލާ އެ މަސައްކަތްވެސް ފެށިގެންދާނެ ކަމަށް ޗަމްޕީ ވިދާޅުވިއެވެ.
ސްވިމިންގެ ރައީސްކަމަށް ޗަމްޕީ އިތުރު ދައުރަކަށް އިންތިހާބުވެވަޑައިގަތީ އިންތިހާބުގައި، އިތުރު ފަރާތަކާ ވާދަކުރުމެއް ނެތި، ފެންނަ ނުފެންނަ ވޯޓުން 96.97 އިންސައްތަ ކާމިޔާބު ކުރައްވައިގެންނެވެ. ސްވިމިންގެ ރައީސްކަމުގައި މިދިޔަ ތިން ދައުރުގައި ހުންނެވި ޗަމްޕީ 2020 ވަނަ އަހަރުގެ ޖުލައި މަހު ބޭއްވި އިންތިހާބު ވެސް ކާމިޔާބު ކުރެއްވީ ހަމައެކަނި ކެންޑިޑޭޓުގެ ހައިސިއްޔަތުން، ނެގި ފެންނަ ނުފެންނަ ވޯޓު ކާމިޔާބު ކުރައްވައިގެންނެވެ.
