ފިނޭންސް މިނިސްޓްރީން ނެރުނު މި އަހަރުގެ ފުރަތަމަ ކުއާޓަލީ ބުލެޓިންގައިވާ ގޮތުން ފުރަތަމަ ކުއާޓަރުގައި ޖުމްލަ ދަރަނި އިތުރުވެފައި ވަނީ އެތެރޭގެ ދަރަނިތަކުގެ ސަބަބުންނެވެ. އެތެރޭގެ ދަރަނި މިހާރު ހުރީ 74.5 ބިލިއަން ރުފިޔާގަ އެވެ. މިދިޔަ އަހަރުގެ ފަހު ކުއާޓަރާ އަޅާބަލާއިރު ބޭރުގެ ދަރަނި ވަނީ 51.6 ބިލިއަން ރުފިޔާއަށް ދަށްވެފަ އެވެ. މިދިޔަ ކުއާޓަރުގައި ބޭރުގެ ދަރަނި ހުރީ 51.7 ބިލިއަން ރުފިޔާގަ އެވެ.
ދައުލަތުގެ ޖުމްލަ ދަރަނި 126 ބިލިއަން ރުފިޔާއަށް އަރާފައިވާއިރު، މިއީ މިދިޔަ ކުއާޓަރާ އަޅާބަލާއިރު ގާތްގަނޑަކަށް 1.3 ބިލިއަން ރުފިޔާގެ އިތުރުވުމެކެވެ.
ޖުމްލަ ދަރަނީގެ ތެރެއިން ދައުލަތުން ނަގާފައިވާ ދަރަނި ހުރީ 112 ބިލިއަން ރުފިޔާގަ އެވެ. ސޮވަރިން ގެރެންޓީގެ ގޮތުގައި 14 ބިލިއަން ރުފިޔާ ވަނީ ނަގާފަ އެވެ.
މިދިޔަ އަހަރުގެ ފަހު ކުއާޓަރަށް ވުރެ މި އަހަރުގެ ފުރަތަމަ ކުއާޓަރުގައި ރާއްޖޭގެ އުފެއްދުންތެރިކަމުގެ ނިސްބަތާ އަޅާބަލާއިރު ދަރަނި ވަނީ ކުޑަވެފަ އެވެ. ފުރަތަމަ ކުއާޓަރުގައި އުފެއްދުންތެރިކަމުގެ ނިސްބަތުން 110.1 އިންސައްތައިގައި ދަރަނި ހުރިއިރު، މިދިޔަ ކުއާޓަރުގައި ދަރަނި ހުރީ 116.5 އިންސައްތައިގަ އެވެ.
