ފޮރިން މިނިސްޓަރު މޫސާ ޒަމީރު މިމަހުގެ 3 އިން 6 އަށް ލަންކާއަށް ކުރައްވަމުން ގެންދަވާ ރަސްމީ ދަތުރުފުޅަކީ އެގައުމުގެ ފޮރިން މިނިސްޓަރު އަލީ ސަބްރީގެ ދައުވަތަކަށް ކުރައްވަމުން ގެންދަވާ ދަތުރުފުޅެކެވެ.
ފޮރިން މިނިސްޓްރީން ބުނީ މި ބައްދަލުވުމުގައި ދެ ގައުމުގެ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާ ކުރެވުނު ކަމަށެވެ.
މި ދަތުރުފުޅުގައި މިނިސްޓަރު ޒަމީރު ލަންކާގެ ބޮޑުވަޒީރު ދިނޭޝް ގުނަވަރްދެނާއާ ބައްދަލުކުރެއްވުމަށް ވެސް ވަނީ ހަމަޖެހިފަ އެވެ. އަދި ދެ ގައުމުގެ ދެ މެދުގައި ގުޅުން ބަދަހިކުރުމާ ގުޅޭގޮތުން ލަންކާގެ ފޮރިން މިނިސްޓަރާއެކު މިއަދު ވަނީ ބައްދަލުވުމެއް ބާއްވާފަ އެވެ.
މިބައްދަލުވުމަށްފަހު މިނިސްޓަރު ޒަމީރު އިއްވެވި ބަޔާނުގައި، ދިވެހިރާއްޖޭގެ ތަރައްގީއަށް ސްރީލަންކާއިން ދެމުންގެންދާ ދީލަތި އެހީތެރިކަން ފާހަގަކުރައްވާ، ދިވެހި ރައްޔިތުންގެ ނަމުގައި ޝުކުރު އަދާކުރެއްވި އެވެ. އަދި ދިވެހިރާއްޖޭގައި ވަޒީފާއަދާކުރާ ސްރީލަންކާގެ މަސައްކަތްތެރިން އަދާ ކުރާ ދައުރުވެސް މިނިސްޓަރު ޒަމީރު ފާހަގަކުރެއްވި އެވެ.
މީގެއިތުރުން ސާކާއި އިންޑިއަން އޯޝަން ރިމް އެސޯސިއޭޝަން (އައިއޯއާރުއޭ) ފަދަ ސަރަޙައްދީ ޕްލެޓްފޯމްތައް މެދުވެރިކޮށް ދެކުނު އޭޝިއާ ސަރަހައްދުގެ ދެމެހެއްޓެނިވި ތަރައްގީއާއި ސުލްހައާއި ސަލާމަތާއި ކުރިއެރުމަށް ދެ ގައުމު ގުޅިގެން މަސައްކަތް ކުރުމަށް އެއްބަސްވެފައިވާ ކަމަށް މިނިސްޓަރު ވިދާޅުވި އެވެ. މީގެއިތުރުން، މަސްވެރިކަމަށް ދެ ގައުމުން ވެސް ބަރޯސާވާއިރު، ދެ ޤައުމުގެ ހާއްސަ އިގުތިސާދީ ސަރަހައްދު ބެލެހެއްޓުމަށް ދެ ގައުމު ގުޅިގެން މަސައްކަތް ކުރުމުގެ މުހިންމު ކަމުގެ މައްޗަށްވެސް މަޝްވަރާކުރެއްވި ކަމަށް މިނިސްޓަރު ވިދާޅުވި އެވެ.
މިނިސްޓަރު އިއްޔެ ވަނީ ލަންކާގެ ބައެއް ވިޔަފާރިވެރިންނާއި، ސިޔާސީ ލީޑަރުންގެ އިތުރުން ލަންކާގައި ދިރިއުޅޭ ދިވެހި ރައްޔިތުންނާ ވެސް ބައްދަލުކުރައްވައިފަ އެވެ. ލަންކާއަށް ކުރައްވާ ރަސްމީ ދަތުރުފުޅު ނިންމަވާލައްވައި މިނިސްޓަރު ރާއްޖެ ވަޑައިގަންނަވާނީ މާދަމާ އެވެ.
ޒަމީރު، ރަނިލް ވިކްރަމްސިންހައާ މިއަދު ބައްދަލުކުރެއްވިއިރު، ރާއްޖެ އިން ލަންކާ އަށް ކަނޑައެޅި އާ ސަފީރު މ. ތުޅާގިރި، މަސްއޫދު އިމާދުގެ މަގާމުގެ ފަތްކޮޅު އެ ގައުމުގެ ރައީސް ރަނިލް ވިކްރަމަސިންހަ އަށް މިއަދު ވަނީ އަރުވައިފަ އެވެ.
