ދުންޔާ މިހެން ވިދާޅުވެފައި މިވަނީ އިޒްރޭލު ޕާސްޕޯޓް މަނާކޮށް އެގައުމުގެ ރައްޔިތުން ރާއްޖެ އެތެރެކުރުން މަނާކުރާނަމަ އެމެރިކާއިން ރާއްޖެއަށް ދެމުން އަންނަ އެހީތައް އެއްކޮށް ކަނޑާލުމަށް އެމެރިކާގެ ގާނޫނު ހަދާ މަޖިލީހުގެ މެންބަރަކު ބިލެއް ހުށަހަޅަން ނިންމާފައި ވަނިކޮށެވެ.
މިކަމާއި ގުޅިގެން ރައީސް ޔާމީންގެ ވެރިކަމުގައި ފޮރިން މިނިސްޓަރުކަން ކުރެއްވި ކުރީގެ ރައީސް މައުމޫން އަބްދުލްގައްޔޫމްގެ ދަރިކަނބަލުން ދުންޔާ އެކްސްގައި ވިދާޅުވީ އެމެރިކާއިން ރާއްޖެއަށް ވެދެނީ ކޮން އެހީއެއްތޯ ބަލަން ޖެހޭ ކަމަށެވެ.
އެމެރިކާގެ ސްޓޭޓް ޑިޕާޓްމަންޓުގެ ތަފާސް ހިސާބުތަކުން ފެންނަ ހުރި ގޮތުގައި މިދިޔަ ހަތަރު އަހަރުގެ ތެރޭގައި އެގައުމުން ގާތްގަނޑަކަށް 36 މިލިއަން ޑޮލަރު (555 މިލިއަން ރުފިޔާ)ގެ މާލީ އެހީތެރިކަން ރާއްޖެއަށް ވަނީ ފޯރުކޮށްދީފައެވެ.
ރާއްޖެެއަށްދޭ އެހީ ހުއްޓާލަން އެމެރިކާގެ ގާނޫނު ހަދާ މަޖލީހަށް ބިލެއް ހުށައަޅަން ނިންމީ އިޒްރާއީލްގެ ދިފާއުގައި އެންމެ ވަރުގަދައަށް އަޑުއުފުލާ ކޮންގްރެސްގެ މެންބަރެއް ކަމަށްވާ ރިޕަބްލިކަން ޕާޓީގެ ޖޯޝް ގޮތެއިމާކަމަށް އެ ގައުމުގެ ނޫސްތަކުން ބުނެއެވެ. މި ބިލު އޭނާ ހުށައަޅަނީ ޑިމޮކްރެޓިކް ޕާޓީގެ މެންބަރުންގެ ތާއީދާވެސް އެކުގައެވެ.
މި ބިލުގައި ބުނެފައިވަނީ ރާއްޖެއަށް އެމެރިކާއިން ދޭ އެއްވެސް އެހީއެއް ދޭން ޖެހޭނީ އިޒްރާއީލު ރައްޔިތުން ރާއްޖެ އެތެރެވާން ހުއްދަ ދިނުމަށް ޝަރުތުކޮށްފައިކަމަށެވެ. އަދި އިޒްރާއިލް ޕާސްޕޯޓް ބޭންކުރާނަމަ އެމެރިކާއިން ރާއްޖެއަށް އެއްވެސް އެހީއެއް ނުދިނުމަށްވެސް އެ ބިލުގައި ހިމަނާފައިވެއެވެ.
އެމެރިކާއިން ދޭ އެހީ ހުއްޓާލަން ބިލެއް އެ ގައުމުގެ މަޖިލީހަށް މި ހުށައަޅަނީ ރާއްޖެއަށް ދޭ އެހީތައް އިތުރުކުރުމަށް އެމެރިކާއިން ދާދި ފަހުން ނިންމާފައިވާ ދަނޑިވަޅެެއްގައެވެ.
