ސްޓޭޓް މިނިސްޓަރު ފައިރޫޒް މިހެން ވިދާޅުވީ މިއަދު އެކްސްގައި ކުރެއްވި ޕޯސްޓެއް މެދުވެރިކޮށެވެ.
ހާރިޖީ ސިޔާސަތަކީ ސޯޝަލް މީޑިއާގެ ހިޔާލުތަކުން ބައްޓަންކޮށްގެން ނުވަތަ އެ ސިޔާސަތު ބޭނުންކުރާ މީހުން ރުއްސުމަށް އަމާޒުކޮށްގެން އޮންނަ ސިޔާސަތަކަށް ވެެގެން ނުވާނެކަމަށް އެ ޕޯސްޓްގައި ފައިރޫޒް ވިދާޅުވި އެވެ.
އޭގެ ބަދަލުގަައި ހާރިޖީ ސިޔާސަތުގެ ނަތީޖާއަކަށް ވާންޖެހެނީ ގައުމީ ވަސީލަތްތައް ފަރުވާތެރިކަމާއެކު "ކެލިބްރޭޓްކޮށް" ، ހަރުދަނާ ވިސްނުންތަކާއި، އިގްތިސާދީ ސިއްހަތާއި، ގައުމަށް ލިބޭ ޖުމްލަ ފައިދާއިންކަމަށް ފައިރޫޒް ވިދާޅުވި އެވެ.
މީގެ އިތުރުން އޭނަ ވަނީ އިޒްރޭލް ޕާސްޕޯޓް މަނާ ކުރަން ނުފެންނަނީ ކޮން ސަބަބުތަކަކާ ހުރެތޯ ކުރީގެ ރައީސް މައުމޫން އަބްދުލް ގައްޔޫމްގެ ދަރިކަލުން ފާރިޝް މައުމޫން ކުރެއްވި ޕޯސްޓަކަށް ރައްދު ވެސް ދެއްވައިފަ އެވެ. އޭގައި ފައިރޫޒް ވިދާޅުވީ އިޒްރޭލު ޕާސްޕޯޓު މަނާކުރުމުން އެ ތަނުގެ މުސްލިމުންނާއި ދެ ގައުމެއްގެ ރައްޔިތުކަން އޮންނަ މީހުންނަށް ވެސް ރާއްޖެ ނާދެވޭނެ ކަމަށެވެ.
މީގެއިތުރުން މި ނިންމުމުގެ ސަބަބުން ރާއްޖޭގެ އިގުތިސާދަށް ގެއްލުން ލިބޭނެ ކަމަށާއި ގައުމީ ސަލާމަތަށް ވެސް ނުރައްކާވާނެ ކަމަށް ފައިރޫޝް ވަނީ ވިދާޅުވެފަ އެވެ.
އިޒްރޭލު ޕާސްޕޯޓު ރާއްޖެއަށް މަނާކުރަން ގާނޫނަށް ގެންނަންޖެހޭ އިސްލާހު ގެނައުމަށް ސަރުކާރުން ނިންމީ، ފަލަސްތީނުގެ ރައްޔިތުންނާ ދެކޮޅަށް ޔަހޫދީން ހިންގާ ގަތުލުއާންމާ ގުޅިގެންނެވެ. މިއީ ދިވެހި އާންމުން ވޭތުވެދިޔަ ގިނަ އަހަރުތަކުގައި ވެސް ގޮވާލަމުންދިޔަ ކަމެކެވެ.
މި ނިންމުމާއި ދެކޮޅަށް ފައިރޫޒް ވާހަކަ ދެއްކެވުމާ ގުޅިގެން ގިނަ ބަޔަކު މިހާރު އަންނަނީ ސޯޝަލް މީޑިއާގައި އޭނަ އަށް ފާޑުކިޔަމުންނެވެ.
