ދުނިޔޭގެ ތިމާވެށީގެ ދުވަހާއި ދުނިޔޭގެ ކަނޑުތަކުގެ ދުވަސް ފާހަގަކުރުމުގެ ގޮތުން އެމްޑަބްލިއުއެސްސީ އާއި ނޭޝަނަލް ސެންޓަ ފޮ ދި އާޓްސް (އެންސީއޭ) ގުޅިގެން "ފެނުން ދިރުން" ނަމުގައި ބާއްވާ ކުރެހުމުގެ މުބާރާތް އިފުތިތާހުކުރުމަށް ރޭ ސަލްޓަން ޕާކުގައި ބޭއްވި ރަސްމިއްޔާތުގައި ވާހަކަ ދައްކަވަމުން މަތީން ވިދާޅުވީ ދިރުން އުފެދުނުތާ 3.7 ބިލިއަން އަހަރު ވެފައިވާއިރު، ފެނުގެ ވާހަކަ ފެށޭ ހިސާބަކީ އެއީ ކަމަށެވެ.
މަތީން ވިދާޅުވެފައި ވަނީ މި މުބާރާތަކީ ވަރަށް އުފާވެރި އަދި އެހާމެ ހާއްސަ މުނާސަބަތަކާ ގުޅިގެން ބާއްވާ މުބާރާތެއް ކަމަށެވެ. ތިމާވެށީގެ ދުވަހާއި ކަނޑުތަކުގެ ދުވަހާ ގުޅުވައިގެން މި މުބާރާތް ފެށިގެންދާއިރު، މުބާރާތުގައި ބައިވެރިވާ ހުރިހާ ކުރެހުންތެރިންގެ ކުރެހުންތައް މައުރަޒެއްގެ ސިފައިގައި ގެނެސްދިނުމަށް ވަނީ ހަމަޖެހިފައި ކަމަށް އޭނާ ވިދާޅުވި އެވެ. މަތީން ވިދާޅުވި ގޮތުގައި މި މައުރަޒު ބޭއްވުމަށް ނިންމާފައި ވަނީ މިނިވަން ދުވަހުގެ މުނާސަބަތާ ގުޅުވައިގެން ކަމުގަ އެވެ.
"ފެނުން ދިރުން" ކުރެހުމުގެ މުބާރާތް އިފުތިތާހުކޮށްދެއްވީ ޔޫތު އެމްޕަވަމަންޓް، އިންފޮމޭޝަން އެންޑް އާޓްސް މިނިސްޓަރު އިބްރާހިމް ވަހީދާއި އެމްޑަބްލިއުއެސްސީގެ މެނޭޖިން ޑިރެކްޓަރު މަތީނެވެ. މި މުބާރާތުގައި ބައިވެރިވުމުގެ ފުރުސަތު 18 އަހަރުން މަތީގެ ކޮންމެ ފަރާތަކަށް ވެސް ވަނީ ހުޅުވާލެވިފަ އެވެ. މުބާރާތުގެ ވެބްސައިޓް މެދުވެރިކޮށް ރަޖިސްޓަކުރުމާ އަދި މުބާރާތާ ބެހޭ އިތުރު މައުލޫމާތު ލިބޭނެ އެވެ.
އެމްޑަބްލިއުއެސްސީން ބުނީ މި މުބާރާތުގައި ބައިވެރިކުރާ ކުރެހުންތަކުން އެންމެ މޮޅު ތިން ކުރެހުމަށް ކަނޑައެޅިފައިވާ ފައިސާގެ އިނާމެއް ލިބޭނެ ކަމަށެވެ. އެގޮތުން އެއް ވަނައަށް ހޮވޭ ފަރާތަށް 50،000 ރުފިޔާ، ދެ ވަނައަށް ހޮވޭ ފަރާތަކަށް 35،000 ރުފިޔާ އަދި ތިން ވަނައަށް ހޮވޭ ފަރާތަކަށް 15،000 ރުފިޔާގެ އިނާމު ލިބޭނެ އެވެ. މީގެ އިތުުރުން އެންމެ މޮޅު ފަސް ކުރެހުމެއް ހޮވައި އެ ކުރެހުންތަކަށް ވެސް ފައިސާ އިނާމު ދިނުމަށް ވަނީ ހަމަޖެހިފަ އެވެ. މި ފަސް ކުރެހުން ހޮވާނީ އާންމުންގެ މެދުގައި އެންމެ މަގުބޫލު ފަސް ކުރެހުމަށް ބެލުމަށް ފަހުގަ އެވެ.
މި މުބާރާތުގައި ބައިވެރިކުރާ ކުރެހުންތައް އާންމުންނަށް ދައްކާލަން ހަމަޖެހިފައި ވަނީ ޖުލައި މަހުގެ 27 ވަނަ ދުވަހުން ފެށިގެން 30 ވަނަ ދުވަހަށް ނެޝަނަލް އާޓް ގެލަރީގައި ބާއްވާ ހާއްސަ މައުރަޒުގަ އެވެ.
