މި މައްސަލާގައި އަށް މީހަކު ހައްޔަރުކުރިއެވެ. މި އެންމެންވެސް ހައްޔަރުކުރީ ކޯޓް އަމުރެއްގެ ދަށުން އިއްޔެކަމަށް ފުލުހުން ވަނީ ބުނެފައެވެ.
ފުލުހުން ބުނީ އެމީހުންގެ ބަންދާއި މެދު ގޮތެއް ނިންމުމަށް ކޯޓަށް ގެންދިއުމުން ޝަރުތުތަކަކައިއެކު އެންމެވެސް ކޯޓުން މިނިވަންކޮށްފައިވާކަމަށެވެ. އެހެންނަމަވެސް އެއީ ކޮން ޝަރުތުތަކެއްކަމެެއް ފުލުހުން ނުބުނެއެވެ.
ތޮއްޑޫގެ ދަނޑުބިންތައް ދަނޑުވެރިން އަތުން އަތުލަން ނިންމާފައިވާކަމަށް ބުނެ އެ ރަށުގައި ބަޔަކު ހަމަނުޖެހުން ހިންގީ މިދިޔަ ބުދަދުވަހުއެވެ. އެމީހުން ކައުންސިލް ދޮށަށް އެއްވެ ހަމަނުޖެހުން ހިންގާ ކައުންސިލް ފުރާޅަށް ގާއުކާފައިވާކަމަށްް ފުލުހުން ވަނީ ބުނެފައެވެ.
މި މައްސަލާގައި ހައްޔަރު ކުރި އަށް މީހުންގެ ތެރޭގައި ކުރީގެ މަޝްހޫރު ފުޓްބޯޅަ ކުޅުންތެރިޔާ މުހްތާރު ނަސީރު، (ޓޫ ކިލޯ) ވެސް ހިމެނެއެވެ.
މި ހަމަނުޖެހުންތައް ކޮންޓްރޯލް ކުރަން އުޅުނު ފުލުހަކަށް އަނިޔާވެ ފަރުވާދޭން ޖެހުނުކަމަށްވެސް ފުލުހުން ވަނީ ކުރިން ބުނެފައެވެ.
މި މައްސަލަ ފުލުހުން ގެންދަނީ ތަހުގީގުކުރަމުންނެވެ.
