ކުޅުދުއްފުށި މާލި ޕެރޭޑްގައި މަށި ލައިގެން އުޅޭ މާލިތަކާއި ކަޅުތެލާއެކުވާ މާލިތަކުގެ އިތުރުން ރަށުގެ މަސައްކަތްތެރިކަންވެސް އެ ޕެރޭޑުން ފެނިގެން ދެއެވެ. އަދި އޭރަކު އެންމެ ހިނގާ އަދި ވާހަކަ ދެކެވޭ ސިޔާސީ ކަންކަމުގެ މައްޗަށް ހަޖޫ ޖަހައި ސިޔާސީ މާލިތަކާއި ފުޅަނދުތައްވެސް ހަރަކާތްތެރިވެ އެވެ.
ރައްޔިތުންގެ މަޖިލިސް ރައީސް އަބްދުއްރަހީމް އަށްވެސް އެ މާލި ޕްރޭޑްގައި ހަޖޫ ޖެހި އެވެ. އެގޮތުން މައުމޫން ދައުރުގައި އެމަނިކުފާނު ޓިނުގެ ވައްކަން ކުރިކަމުގެ ކުށް ސާބިތިވެގެން ޖަލަށް ލިއެވެ. އެއަށްފަހު އަބްދުއްރަހީމް މަޝްހޫރި ވީ "ޓިނު އަދުރޭ" ގެ ނަމުންނެވެ. ކުޅުދުއްފުށީގައި ކުރިއަށް ގެންދިޔަ އެ މާލި ޕްރޭޑްގައި މަޖިލިސް ރިޔާސަތުގައި ހުންނެވީ "ޓިނު އަދުރޭ" ކަން ދައްކުވައިދޭ މަންޒަރުތަކެއްވެސް ހުށަަހަޅައިދިނެވެ.
ކުޅުދުއްފުށި މާލި ޕެރޭޑްތެރެއިން ފޮޓޯ: ކުޅުދުއްފުށި އޮންލައިން
މި މާލި ޕެރޭޑްގައި އެމްޕީއެލްގެ ސީއީއޯ މުހައްމަދު ވަޖީހު އިބްރާހީމް މިފަހުން ، އެކުންފުނީގެ ކާޑު، އަމިއްލަ ބޭނުންތަކަށާއި ، ނަހަމަގޮތެއްގައި ބޭނުންކުރި މައްސަލަ ވެސް ދައްކުވައިދިނެވެ.
ކުޅުދުއްފުށި މާލި ޕެރޭޑްތެރެއިން ފޮޓޯ؛ ކުޅުދުއްފުށި އޮންލައިން
މީގެއިތުރުން މިޔަރެއް ދިން ހަމަލާގައި ސިފައިންގެ މީހަކު ނިޔާވި މައްސަލާގައި، މިޔަރުގެ އާބާދީ އިތުރުވުން ކޮންޓްރޯލްކުރުމަށް ފިޔަވަޅު ނޭޅުމުގެ ސަބަބުން ފިޝަރީޒް މިނިސްޓަރު އަހުމަދު ޝިޔާމްއަށް ހަޖޫ ޖެހުމުގެ މަންޒަރެެއްވެސް މާލި ޕްރޭޑްގައި ދައްކުވައިދިނެވެ.
އެކަމަށް އެކްސްގައި ޕޯސްޓެއް މެދުވެރިކޮށް މިނިސްޓަރު ޝިޔާމް ވަނީ ރައްދުދީފަ އެވެ.
ކޮންމެ އަހަރުވެސް ބޮޑުއީދުގައި ކުޅުދުއްފުށީގައި ކުރިއަށްގެންދާ މަށިމާލި ޕެރޭޑަކީ މުޅިން ތަފާތު ކަންކަން ދައްކުވާދޭ މާލިޕެރޭޑެކެވެ.
