ފީފާ ބައްސާމް ސަސްޕެންޑް ކުރީ ނުވަ މަސް ދުވަހެވެ. އެކަން ހާމަކޮށް ފީފާއިން މިރޭ ނެރުނު ބަޔާނެއްގައި ބުނެފައިވަނީ މިއީ ރާއްޖޭގެ ޕްރޮސެކިއުޓާ ޖެނެރަލް ކުރަމުން އަންނަ ތަހުގީގުގެ ކަންކަމަށް ބަލައި އެކަމުގެ އަލީގައި އަޅާފައިވާ ފިޔަވަޅެއް ކަމަށެވެ.
އެފްއޭއެމަށް ބޭރުގެ އިދާރާތަކުން ދޭ ފައިސާ އަށް ހިޔާނާތްތެރިވެފައިވާ ކަމަށް ތުހުމަތު ކުރެވިފައިވާ، ބައްސާމްގެ މައްޗަށް އުފުލާފައިވާ ޖިނާއީ ދައުވާތަކެއް ކޯޓުގައި އަންނަނީ ހިނގަމުންނެވެ.
ބައްސާމް ސަސްޕެންޑްކޮށް، ސަސްޕެންޝަން ގުނަން ފަށާފައިވާކަން ފީފާ އިން މިހާރުވަނީ ބައްސާމްއަށް އަންގާފައެވެ.
ފުޓްބޯޅައިގެ ހުރިހާ ހަރަކާތަކުން ބައްސާމް ސަސްޕެންޑްކުރިއިރު، އަންނަ މަހު ކުރީކޮޅު ބައްސާމްގެ ދައުރު ހަމަވާނެއެވެ. ސަސްޕެންޑް ކުރިއިރު، އެންމެ ފަހުން ބާއްވަން އުޅުނު އެފްއޭއެމްގެ އިންތިހާބުގައި ބައްސާމް ވާދަކުރައްވަން އެޕްލިކޭޝަން ހުށަހެޅުއްވިއެވެ.
ފީފާގެ އިންވެސްޓިގޭޓަރީ ޗެމްބަރުން ހޯދި ހޯދުމުން، ބައްސާމް ވަނީ އެފްއޭއެމްގެ އެންމެ އިސްވެރިއެއްގެ މަގާމުގެ ނުފޫޒު ބޭނުންކޮށްގެން، ހަދިޔާ ހޯދުމާއި ރާއްޖެ އަށް ލިބޭ ފައިސާ ނަަހަަމަ ގޮތުގައި ބޭނުންކުރުމުގެ ކަންތައްތަކެއް ކޮށްފައިވާ ކަމުގެ މައުލޫމާތު ވެސް ލިބިފައިވެ އެވެ. އަދި މި ކަންކަމުގެ ތަހުގީގު އިތުރަށް ކުރިއަށްގެންދަން ފީފާ އިން ވަނީ ނިންމައިފަ އެވެ.
