ސައުދީ ސަރުކާރުން ބުނީ މަރުވި މީހުންގެ ތެރެގައި ގިނައީ ހައްޖުގެ ހުއްދަ ނެތުމުގެ ސަބަބުން ބޯހިޔާވަހިކަމެއް، އަރާމެއްނެތި ގަދަ އަވީގައި ދިގު ރާސްތާތަކަށް ހިނގާފައި ދިޔަމީހުންކަމަށެވެ. އޭގެތެރޭގައި އުމުރުން ދުވަސްވީ މީހުންނާއި ދާއިމީ ބަލިތައް ހުންނަ މީހުން ވެސް ހިމެނޭކަމަށްް ސައުދީ ސަރުކާރުން ބުނެއެވެ. 

ހައްޖު މޫސުމުގައި މަރުވި އެންމެން ދެނެގަތީ އެމީހުން އާއިލާތަކާއި ގުޅޭ މައުލޫމާތުތައް ކަށަވަރުކުރުމަށްފަހުކަމަށް ސައުދީ ސަރުކާރުން ބުނެއެވެ. އަދި އާއިލާތަކުގައި ހުއްދައާއި އެކު އެ އެންމެންވެސް މައްކާގައި ވަޅުލާފައިވާކަމަށް ސައުދީ ސަރުކާރުން ބުނެއެވެ.  

އެކި ސިއްހީ ސަބަބުތައް ދިމާވެގެން މިއަހަރު ހައްޖު މޫސުމުގައި 465,000 މީހުންނަށް ފަރުވާދޭން ޖެހުނުކަމަށްވެސް ސައުދީގެ ރަސްމީ އިދާރާތަކުން ބުނެއެވެ. 

މި އަހަރުގެ ހައްޖުގައި ސައުދީގައި ހޫނުމިން ހުރީ 52 ޑިގްރީ ސެލްސިއަސްގައެވެ. ހޫނު ގަދަވުމުން ހީޓް ސްޓްރޯކް ޖެހިގެން މަރުވި މީހުންގެ އަދަދުވެސް 500 ވުރެ މައްޗަށްް އަރައެވެ. 

މި އަހަރުގެ ހައްޖުގައި 1.8 މިލިއަން މީހުން ބައިވެރިކަން ސައުދީން ވަނީ ހާމަކޮށްފައެވެ. 

ރާއްޖެއިންވެސް މިއަހަރުގެ ހައްޖުގައި 1150 މީހުން ބައިވެރިވިއެވެ. ހައްޖު ދުވަސްވަރު ނިޔާވީ މީހުންގެ ތެރޭގައި ދިވެއްސެއްވެސް ހިމެނެއެވެ.