މިފްކޯއަށް މަސްވެރިން ކިރާ މަހަށް ލިބެންޖެހޭ ފައިސާ ވަގުތުން ވަގުތަށް ހަމަޖައްސައިދިނުމަށް ގޮވާލާ ރައްޔިތުންގެ މަޖިލީހަށް މަރަދޫ ދާއިރާގެ މެންބަރު އަހުމަދުދީދީ މިއަދު ހުށަހެޅުއްވި ކުއްލި މައްސަލައިގެ ބަހުސްގައި ނާޒިމް ވިދާޅުވީ މިފްކޯއަށް މަސް ގަންނަ އަގަކީ ދެކޮޅު ޖެހޭ އަގެއް ނޫން ކަމަށެވެ.
ސިޔާސީ ވިސްނުން އެއްކައިރިކޮށް، މިކަމުގައި ގައުމަށް ފައިދާ ހުރި ހައްލަކަށް އައުމަށް އެމްޑީޕީގެ މެންބަރުންގެ ކިބައިން ނާޒިމް އެދިވަޑައިގެންނެވި އެވެ. އަދި މިކަމުގައި ސިޔަސީ ފައިދާއަށް މަސައްކަތް ކޮށްގެން މިހާރު ވެސް އަދި ފަހުން ވެސް ފައިދާ ނުކުރާނެ ކަމަށާއި މިދިޔަ ރިޔާސީ ކެމްޕެއިން ތެރޭ ކުރީގެ ސަރުކާރުން 25ރ.އަށް މަސް ކިލޯއެއް ހެދުމުން ވެސް ރައްޔިތުން އެ ސަރުކާރަށް ބުނީ ނުނެކޭކަން ވެސް އޭނާ ފާހަގަކުރެއްވި އެވެ.
ދެމެހެއްޓެނިވި ގޮތެއްގައި ފައިސާ ބަރާބަރަށް ދެވޭނީ ފައިސާ ބަރާބަރަށް ދެވޭ އަގެއްގައި މަސް ގަނެގެންކަން ނާޒިމު ފާހަގަކުރެއްވި އެވެ.
ނާޒިމު ވިދާޅުވި ގޮތުގައި މިފްކޯގެ މަރުކަޒުތަކުގައި 614 ދޯނި ރަޖިސްޓްރީކޮށްފައިވެ އެވެ. އެ ދޯނިތަކުގައި 17،000 މަސްވެރިން ތިބިއިރު އޭގެ ތެރެއިން 3،700 މަސްވެރިންނަކީ ކަންނެލި މަސްވެރިންނެވެ.
އޭނާ ވަނީ މިހާރު ސަބްސިޑީ ދެވޭ ގޮތް އިންސާފުވެރިނޫން ކަމަށް ވިދާޅުވެފަ އެވެ. އަދިމިފްކޯއިން ކޮންމެ ކިލޯއަކަށް 8ރ. ގެއްލުންވާއިރު، އެ އަގުގައި މަސް ގަނެގެން ދެމެހެއްޓެނިވި ގޮތެއްގައި އެކަން ނުކުރެވޭނެ ކަމަށް އޭނާ ވިދާޅުވި އެވެ.
އަދި ވިދާޅުވީ ހައްލަކީ ދެކޮޅު ޖެހޭ އަގެއްގައި މަސް ވިއްކުން ކަމަށެވެ. އޭރުން ލާރިކޮޅު ވެސް ބަރާބަރަށް ލިބޭނެ ކަމަށް ވިދާޅުވި އެވެ.
މިފްކޯއިން މަސްވެރިންނަށް ފައިސާ ނުދީ ގިނަ ދުވަސްވެ، މަސްވެރިން އަންނަނީ ހުކުރު ދުވަހުން ފެށިގެން އައްޑޫ ފިޝަރީޒް ކޮމްޕްލެކްސް (އޭއެފްސީ)ގައި އިހުތިޖާޖުކުރަމުންނެވެ.
މަޖިލީހުގެ މިއަދުގެ ޖަލްސާއަށް އެމްޑީޕީގެ ފަރާތުން މަސްވެރިންގެ ކަންބޮޑުވުންތައް ފާހަގަކޮށް ކުއްލި މައްސަލައެއް ހުށަހެޅުއްވީ މަރަދޫ ދާއިރާގެ މެންބަރު އަހުމަދު ދީދީއެވެ. ސަރުކާރު ހިންގާ ޕީއެންސީގެ މެންބަރުންގެ ވެސް ވޯޓާ އެކު ޖުމުލަ 74 ވޯޓުން އެ މައްސަލަ ވަނީ މަޖިލީހުގެ ތަޅުމަށް ބަލައިގެންފައެވެ.
އަހުމަދު ދީދީ ހުށަހެޅުއްވި މައްސަލައިގައި ވިދާޅުވީ، މަސްވެރިންނަށް 48 ގަޑިއިރު ތެރޭގައި ފައިސާ ދޫކުރާނެ ކަމަށް ސަރުކާރުން ވައުދުވި ނަމަވެސް އެކަން އެގޮތަށް ނުވުމުގެ ސަބަބުން މަސްވެރި އާއިލާތައް އުޅެމުން އަންނަނީ ވަރަށް ހާލުގައި ކަމަށެވެ.
