އުމުރުން 28 އަހަރުގެ މުހައްމަދު ޝަރީފުލް އިސްލާމް ޝެހްޒާދުގެ މައްޗަށް 1600 ސަފުހާގެ ދައުވާ ފޯމެއް ބަންދްރާ މެޖިސްޓްރޭޓް ކޯޓަށް ހުށަހަޅާފައިވާކަމަށް ޕޮލިހުން ބުނެފައިވެއެވެ. މި އަހަރުގެ ޖަނަވަރީ 16 ވަނަ ދުވަހު ސައިފް އަލީ ހާންގެ ގެއަށް ވަދެ ވައްކަންކުރަން އުޅުނު ވަގުތު ސައިފް އަށް ތޫނު އެއްޗަކުން ހަމަލާދީ ބޮޑެތި އަނިޔާތަކެއް ކޮށްފައިވާކަމަށް ތުހުމަތުކުރެވެއެވެ.
ޝެހްޒާދު ހައްޔަރުކުރެވުނީ ޖަނަވަރީ 19 ވަނަ ދުވަހު ތާނޭ ސަރަހައްދުންނެވެ. ދައުވާ ފޯމުގައި ޑީއެންއޭ އާއި ފިންގާ ޕްރިންޓް ހެކި، މޫނު ދެނެގަތުމުގެ ޑޭޓާ، ސީސީޓީވީ ފުޓޭޖް އަދި 40 އަށްވުރެ ގިނަ ހެކިވެރިންގެ ބަޔާން ހިމެނެއެވެ. މީގެ ތެރޭގައި ސައިފް އަލީ ހާން، އޭނާގެ އަނބިކަނބަލުން ކަރީނާ ކަޕޫރު ހާން އަދި ގޭގެ މުވައްޒަފުންގެ ބަޔާންތައް ހިމެނެއެވެ. މުންބާއީ ޕޮލިހުގެ އިސް އޮފިސަރެއް ބުނީ މި މައްސަލައިގެ ތަހުގީގު ވަރަށް ފުރިހަމައަށް ކުރެވި، ހެކިތައް ވަރަށް ސާފުކަމަށެވެ.
ޝެހްޒާދުގެ މައްޗަށް މީހަކު މަރަން އުޅުމާއި، ވައްކަންކުރުމާއި، ގަދަކަމުން ގެއަކަށް ވަނުމުގެ ދައުވާތައް ކުރެވިފައިވެއެވެ. ކޯޓުން އަވަހަށް މި މައްސަލައިގެ ޝަރީއަތް ފެށުމަށް ތާރީހެއް ކަނޑައަޅާނެކަމަށް ބެލެވެއެވެ. މި ހާދިސާއިން ބޮލީވުޑް އާއި ސައިފް އަލީ ހާންގެ ފޭންސް ވަނީ ބޮޑަށް ކަންބޮޑުވެފައެވެ. ދައުވާ ފޯމު ހުށަހެޅުމަށްފަހު ސައިފް އަލީ ހާން އަދި ކަރީނާ ކަޕޫރު ހާން އެއްވެސް ބަޔާނެއް ދީފައިނުވާއިރު، އެ ދެމަފިރިން މިހާރު ފޯކަސްކުރަނީ ސައިފް އަލީ ހާންގެ ރިކަވަރީއަށްކަމަށް ގާތް ފަރާތްތަކުން ބުނެފައިވެއެވެ.
