ހައުސިން ޑިވޮލަޕްމަންޓު ކޯޕަރޭޝަން އިން ބުނީ، ވިނަރެސްގެ ނުވަ ވަނަ ޓަވަރާއި 10 ވަނަ ޓަވަރުގައި މިމަހުގެ 23 ވަނަ ދުވަހުން ފެށިގެން އެކްސެސް ކޮންޓްރޯލް ސިސްޓަމް ބޭނުން ކުރަން ފަށާފައިވާ ކަމަށެވެ.
އެޗްޑީސީއިން ބުނީ، ޓަވަރު އެކަކުން ހަތަރަކަށް އިއްޔެއިން ފެށިގެން އެކްސެސް ކޮންޓްރޯލް ސިސްޓަމް ބޭނުންކުރަން ފަށާފައިވާ ކަމަށާއި، ފަސް ވަނަ ޓަވަރުން ފެށިގެން އަށް ވަނަ ޓަވަރަށް މިއަދުން ފެށިގެން ބޭނުންކުރަން ފަށާފައިވާ ކަމަށެވެ.
އެކްސެސް ޓެގް ސަރުކާރު ބަންދު ނޫން ކޮންމެ ދުވަހެއްގެ ހެނދުނު 9:00 އިން ފެށިގެން 3:30 އަށް ވިނަރެސް 10ގެ މެނޭޖުމަންޓް އޮފީހުން ދޫކުރާނެ ކަމަށްވެސް އެޗްޑީސީން ވަނީ މައުލޫމާތު ދެއެވެ.
ޓެގާއި ހަވާލުވުމަށް ފުލެޓުގެ މެއިން އެޕްލިކޭންޓު އަންނަނަމަ އައިޑީކާޑު ގެނައުމަށާއި، ކޯ އެޕްލިކޭންޓު ދާނަމަ މެއިން އެޕްލިކެންޓުގެ އައިޑީކާޑާާއި ޓެގާ ހަވާލުވާން ދާ ފަރާތުގެ އައިޑީކާޑު ގެނައުމަށް އެޗްޑީސީން ވަނީ އެދިފަ އެވެ.
މީގެ އިތުރުން، މި ދެ މީހުންނަށްވެސް ނުދެވޭނަމަ ޕަވާ އޮފް އެޓާނީ ހަވާލުކޮށްފައިވާ ފަރާތަށް ޓެގު ހަވާލުކޮށްދޭނެ ކަމަށް އެޗްޑީސީން ވަނީ ވިދާޅުވެފަ އެވެ. ނަމަވެސް ޕަވާ އޮފް އެޓާނީ ފޯމާއި އެ ފޯމުގައިވާ ހުރިހާ މީހުންގެ އައިޑީކާޑު ގެނައުމުން ނޫނީ ޓެގު ދޫނުކުރާނެ ކަމަށް އެ ކޯޕަރޭޝަނުން ބުންޏެވެ.
