ޑިގްރީއާ މާސްޓާސްގެ ވަގު ސެޓްފިކެޓްތަކެއް ހުށައަޅަފާއިވާ މީހެއްގެ މައްސަލަ ފެންމަތިވެ ބަލަމުން އަންނަކަމަށް މޯލްޑިވްސް ކޮލިފިކޭޝަން އޮތޯރިޓީގެ ސީއީއޯ މަރިޔަމް ފިޒާނާ ރަޝީދު ވިދާޅުވެއްޖެއެވެ.
Advertisement
ފިޒާނާ ފޭސްބުކްގައި ކުރި ޕޯސްޓެއްގައި ވިދާޅުވީ ފޯޖުކޮށްފައިވާ އެ ސެޓްފިކްޓްތައް ހުށަހެޅީ، މީގެ ކުރިން ވެސް އެފަދަ، ވަގު ސެޓްފިކެޓެއް ހުށަހެޅި މީހެއްކަމަށެވެ. އޭނާގެ މައްސަލަ މިހާރު ވެސް އޮތީ ފުލުސް އޮފީހުގައެވެ.
"މިހާރު އޭނާ އަތުގައި އެބަ އޮތް ސައްހަ ނޫން ދެ މާސްޓާސް ޑިގްރީ އާއި އެއް ބެޗްލާސް ޑިގްރީ [ސެޓްފިކެޓް]،" ފިޒާނާ ވިދާޅުވި އެވެ.
ފިޒާނާ ވިދާޅުވީ އެ ވަގު ސެޓްފިކެޓްތަކާ އެކު އެ މީހާ އުޅެނީ މެނޭޖަރު ފެންވަރުގެ މަގާމެއްގައިކަމަށެވެ.
"ބޮޑެތި، ފަތަށް ބަރު ސަނަދުތައް ކިހިލި ޖަހާލައިގެން މި ދަނީ ވަޒީފާއަށް. ލިބޭ މުސާރަ ވެސް ހަލާލެއް ނުވާނެ،" ފޭސްބުކްގައި ފިޒާނާ ކުރެއްވި ޕޯސްޓުގައިވެއެވެ.
ވަޒީފާތަކުގައި ތިބި މީހުންގެ ސަނަދު ވެރިފައި ކުރާވަރުވެއްޖެކަމަށް ފިޒާނާ ރަޝީދު މީގެ ކުރިން ވަނީ ވިދާޅުވެފައެވެ.
