ޝާހިދު މިހެން ވިދާޅުވީ މިއަދު ފާހަގަކުރާ އެމްޑީޕީގެ ނަވާރަވަނަ އަަހަރީ ދުވަހުގެ މުނާސަބަތުގައި ފޮނުވި ތަހުނިޔާ މެސެޖެއްގައެވެ.
ޝާހިދު ވިދާޅުވީ އެމްޑީޕީ އަކީ ދިވެހި ރައްޔިތުންގެ އުންމީދާއި ފާރަވެރި ވާދަވެރި ސިޔާސީ ނިޒާމެއްގެ އަލި ދަންމަރުކަމަށެވެ. އަދި ރާއްޖޭގެ އިޖުތިމާޢީ، އިޤްތިޞާދީ އަދި ސިޔާސީ ވެށީގެ ރައްކާތެރި މީޒާންކަމަށާއި ޢާންމު ރައްޔިތުންގެ ހަމައިގައި ހަމަ ހަމަ ފުރުސަތު އޮންނަ ނޫ އިޤްތިސާދަކާއި، ޖީލުތައް ރައްކާތެރިވާނެ ތިމާވެށި ހިމާޔަތް ދިރިއުޅުމެއް ދިވެހިންނަށް ހޯދައިދިނުމީ އުފާވެރި ދިވެހިރާއްޖެއެއްގެ އަސާސްކަމަށްވެސް ޝާހިދު ވިދާޅުވިއެވެ.
ޝާހިދުގެ މެސެޖްގައިވަނީ މާތްވެގެންވާ އިސްލާމްދީނުގެ ތަރުބިއްޔަތާއި، ޒަމާނީ ޑިމޮކްރެޓިކް މުޖުތަމަޢެއްގެ ސިފަތައް ދައުލަތުގެ އެންމެހައި ބަހާތަކުން ފެންނަކަން ކަށަވަރު ކުރުމަކީއެމްޑީޕީގެ އަމާޒުކަމަށެވެ. ދޮގާއި މަކަރާއި އޮޅުވާލުމުގައި ދިވެހިން މަކުޑިއަޅުވާ، ބަންދުކޮށް، ހުއްޓުވިދާނެކަމަށް އެއްވެސް ބަޔަކު ޤަބޫލު ކުރާނަމަ އެކުރެވެނީ ވަރަށް ބޮޑު ކުށް ހީއެއްކަމަށްވެސް ޝާހިދު ވިދާޅުވިއެވެ.
މިއަދަކީ ރާއްޖޭގައި މަލްޓީ ޕާޓީ ސިސްޓަމް ތައާރަފުވެ ފުރަތަމަ ރަޖިސްޓްރީ ކުރީ ސިޔާސީ ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އުފެދުނުތާ 19 އަހަރު ފުރޭ ދުވަހެވެ. އެމްޑީޕީ ރަޖިސްޓްރީ ކުރީ 2005 ވަނަ އަހަރުގެ ޖޫން މަހުގެ 26ގައެވެ.
