ފެނަކައިން ނެރުނު ބަޔާނުގައި ބުނެފައިވަނީ، އެ ކުންފުނީގެ ކަރަންޓުގެ ހިދުމަތް ދެވިފައިވާ ރަށްތަކުގެ މަގު ބައްތި ތަކުގެ ސަލާމަތީ ކަންތައްތައް ހުރިގޮތް ބެލުމުގެ ގޮތުން ހުރިހާ ރަށެއްގައި ހުރި މަގުބައްތިތައް އިންސްޕެކްޓް ކުރެވިފައިވާ ކަމަށެވެ.
އަދި އެ ކުންފުނިން ބުނީ، މި އިންސްޕެކްޝަނުން ގިނަ ރަށްތަކުގައި ހަރުކުރެވިފައި ހުރި މަގުބައްތިތަކަށް ކަރަންޓް ދެވިފައި ހުރީ އީއެލްސީބީ މެދުވެރި ނުކޮށްކަން ފާހަގަ ކުރެވިފައިވާ ކަމަށެވެ.
މިގޮތަށް ކަރަންޓް ދޫކުރެވިފައި ހުރުމުން ނުރައްކާތެރި ހާދިސާއެއް ހިނގުމަކީ އެކަށީގެންވާ ކަމަކަށް ވަތީ ނުރައްކާތެރި ހާދިސާއެއް މެދުވެރިވިޔަ ނުދިނުމަށްޓަކައި އަޅާ ފިޔަވަޅެއްގެ ގޮތުން، އެ ކުންފުނިން ކަރަންޓްގެ ހިދުމަތް ދެވޭ މަގުބައްތިތަކަށް، ކަރަންޓް ދޫކުރެވޭނީ އެ ކުންފުނިން ދޭ ނަމޫނާ ކުރެހުމާއި އެއްގޮތަށް ކަމަށް އެ ކުންފުނިން ބުންޏެވެ.
އެ ކުންފުނިން ބުނީ، ސަބްޑިބީ ހަރުނުކުރެވި ހުރި މަގުބައްތިތައް މި މަހުގެ 27 ވަނަ ދުވަހުގެ ކުރިން ސަބްޑީބީ ހަރުކޮށް ނިންމުމަށް ކުރިން އަންގާފައިވީ ނަމަވެސް ގިނަ ކައުންސިލްތަކުގެ އެދުމުގެ މަތިން މި މުއްދަތު އެއް މަސް ދުވަހަށް އިތުރުކޮށްފައިވާ ކަމަށެވެ.
މިއީ ޔޫއާރުއޭގެ މިންގަނޑަށް މަގު ބައްތިތަށް ގެނައުމަށް ކުރެވޭ މުހިންމު މަސައްކަތެކެވެ. އެހެންކަމުން މި މުއްދަތުގެ ތެރޭގައި މިންގަނޑާއި އެެއްގޮތަށް އިސްލާހު ނުކުރެވޭ މަގު ބައްތިތަކުން ކަރަންޓް ޖުލައި މަހުގެ ނިޔަލަށް ކަނޑާލެވޭނެ ކަމަށް އެ ކުންފުނިން ބުންޏެވެ.
