އެކްސްގައި ކުރި ޕޯސްޓެއް މެދުވެރިކޮށް ސްޓެލްކޯގެ އެމްޑީ ވިދާޅުވީ އެ ޕާޓްނާޝިޕްއާއި އެކު އަމާޒުކުރަނީ އިއާދަކުރަނިވި ހަކަތައަށް ބަދަލުވުން އަވަސްކޮށް، ރާއްޖޭގައި ދެމެހެއްޓެނިވި މުސްތަގުބަލެއް އާލާކުރުމަށް ކުރިއަރާފައިވާ ޒަމާނީ ހައްލުތައް ބޭނުންކުރުންކަމަށެވެ.
މީގެ އިތުރުން މި ޕާޓްނާޝިޕްއާއިއެކު ރައީސް ޑރ. މުއިއްޒުގެ ދައުރުގައި 33 ޕަސެންޓް އިއާދަކުރަނިވި ހަކަތަ ހާސިލްކުރުމަށް ވެވަޑައިގެންނެވި ވައުދު ފުއްދުމަށް އެހީތެރިވެދޭނެ ކަމަށްވެސް އެ ޕޯސްޓްގައި ފަހުމީ ވިދާޅުވި އެވެ.
ސަރުކާރުގެ އަމާޒަކީ ރާއްޖޭގައި ބޭނުންކުރާ ކަރަންޓުގެ 33 އިންސައްތަ އުފައްދައިދޭނެ އިއާދަކުރަނިވި ހަކަތައިގެ ނިޒާމެއް ކުރިއަށް އޮތް ފަސް އަހަރުގެ ތެރޭގައި ގާއިމުކުރުން ކަމުގައި ރައީސް މުއިއްޒު ވަނީ ވިދާޅުވެފަ އެވެ.
ރައީސް މުއިއްޒުގެ ވެރިކަމަށް 6 މަސް ވެފައިވާއިރު މިހާރުވެސް އިޔާދަކުރަނިވި ހަކަތަ ގާއިމްކުރުމަށް ދަނީ ގިނަ މަސައްކަތްތަކެއް ކުރިއަށް ގެންދަމުންނެވެ.
އެގޮތުން މިމަހު ކުރީކޮޅު ބ އަތޮޅުގައި އިޔާދަކުރަނިވި ހަކަތައިގެ ޕްރިޕެއަރިންގްއައުޓާ އައިލެންޑްސް ފޯ ސަސްޓެއިނެބިލިޓީ އެނާޖީ ޑިވެލޮޕްމެންޓް (ޕޮއިސްޑް) ޕްރޮޖެކްޓް ފެށުމަށް ގިނަ ތައްޔާރީތަކެއްވިއެވެ. "ޕޮއިސްޑް" ޕްރޮޖެކްޓަކީ ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓްރީ އާއި ފެނަކަ އާ ގުޅިގެން އޭޝިއަން ޑެވެލޮޕްމެންޓް ބޭންކް (އޭޑީބީ) ގެ އެހީގައި ކުރިއަށްގެންދާ ޕްރޮޖެކްޓެކެވެ. އަދި އެ ޕްރޮޖެކްޓް ނިމުމުން ކަރަންޓު ދިނުމަށް ފެނަކައިން ތެލަށް ކުރާ ހަރަދުން ކޮންމެ އަހަރަކު 11 މިލިއަން ރުފިޔާ ސަލާމަތް ކުރެވޭނެ ކަމަށް އެ ކޯޕޮރޭޝަނުން ބުނެއެވެ.
މީގެއިތުރުން ޗައިނާ ސަރުކާރުގެ އެހީގައި ކަށިދޫގައި ވައިން ހަކަތަ އުފެއްދުމުގެ ނިޒާމެއް ނިމިދިޔަ މާޗް މަހުގެ ތެރޭގައި ގާއިމްކޮށްފައިވެ އެވެ.
