![](https://cnm.mv/media/images/jhahajajajaa.jpeg)
ގަވައިދާ ހިލާފަށް އުޅޭ ބިދޭސީން އަތުލައިގަތުމަށް މިދިޔަ ހޮނިހިރު އިމިގްރޭޝަނާއި ފުލުހުން ގުޅިގެން ވަނީ ހާއްސަ އޮޕަރޭޝަނެއް ހިންގާފައެވެ. އިމިގްރޭޝަނުން ބުނީ އެ އޮޕަރޭޝަނަކީ އެ އިދާރާއިން މިހާތަނަށް ކުރިޔަށް ގެންދިޔަ އެންމެ ބޮޑު އޮޕަރޭޝަންކަމަށެވެ.
މި އޮޕަރޭޝަންގައި މާލެ ސަރަހައްދުގެ 4 ތަނެއް ބަލައި ވަނީ ފާސްކޮށްފައިވާކަމަށް އިމިގްރޭޝަނުން ބުނެއެވެ. އެ އިދާރާއިން ވަނީ މި އޮޕަރޭޝަންގެ ބައެއް ވީޑިއޯތައް އާއްމުކޮށްފައެވެ.
އެ މަންޒަރުތަކުން ފެންނަ ގޮތުން ގަވައިދާ ހިލާފަށް އުޅުނު ގިނަ އަދަދެއްގެ ބިދޭސީން އަތުލައިގަތީ މާރުކޭޓް ގޮޅިތަކުންނެވެ. އަދި ބައެއް ގޮޅިތަކުގައި ހަދާފައިވާ އަށިތަކުގެ ދަށުގައިވެސް ބައެއް ބިދޭސީން ފިލާ ތިއްބެވެ. މިމީހުން އެތަނުން ނެރޭތަންވެސް މި ވީޑިއޯތަކުން ފެނެއެވެ. އަދި އަތުލައިގެން މީހުން އަތުން ގިނަ އަދަދެއްގެ ފޯނުތަކެއް އަތުލާފައިވާތަންވެސް ފެނެއެވެ.
ބިދޭސީންގެ އަތުން އަތުލައިފައި ހުރި ފޯނުތައް
އިމިގްރޭޝަނުން ބުނީ މި އޮޕަރޭޝަންގައި އެ އިދާރާގެ ބެލުމުގެ ދަށަށް 83 ބިދޭސީއެއް ގެންދިޔަކަމަށާއި އެ އެންމެންގެ ބަޔާންތައް މިހާރު ނަގާފައިވާކަމަށެވެ.
ގަވައިދާ ހިލާފަށް އުޅޭ ބިދޭސީން ހޯދާ ފިޔަވަޅު އެޅުމަށްް ކުރަމުންދާ މަސައްކަތުގެ ދަށުން ގަވައިދާ ހިލާފަށް އުޅުނު 1800 އަށްވުރެ ގިނަ ބިދޭސީން މިހާތަނަށް އެމީހުންގެ ގައުމަށް ފުރުވާލާފައިވާ ކަމަށް އިމިގްރޭޝަނުން ބުނެއެވެ.
ހޮނިހިރު ދުވަހު އަތުލައިގެން ބައެއް ބިދޭސީން އިމިގްރޭޝަންގެ ބެލުމުގެ ދަށަށް ގެންދަނީ
ރާއްޖޭގައި އުޅޭ ބިދޭސީން ހޯދާ އެމީހުން ގަވައިދަށް ފެއްތުމަށް "ކުރަނގި" ގެ ނަމުގައި ހޯމް މިނިސްޓްރީންވެސް ވަނީ ހާއްސަ އޮޕަރޭޝަނެއް ފަށާފައެވެ. މި މަސައްކަތުގައި ދަށުން ބިދޭސީން ހޯދާ އެމީހުން އިނގިލީގެ ނިޝާންތައް ދަނީ ނަގަމުންނެވެ. މިހާތަނަށް 1700 ވުރެ ގިނަ ބިދޭސީންގެ އިނގިލީގެ ނިޝާންތައް ނަގާ މައުލޫމާތުތައް ވަނީ އެއްކޮށްފައެވެ. އެއްވެސް އައިޑެންޓީއެއް ނެތް މީހުން އެމީހުންގެ ގައުމަތަކާއި ގުޅި ޓްރެވަލް ޑޮކިއުމެންޓް ހަދާ އެމީހުން ފޮނުވާލާނެކަމަށް ހޯމް މިނިސްޓްރީން ވަނީ ބުނެފައެވެ.
ގަވައިދާ ހިލާފަށް އުޅޭ ބިދޭސީންގެ މައްސަލަ 3 އަހަރުގެ ތެރޭގައި ހައްލުކުރައްވާނެކަމަށް ދާހިލީ ވަޒީރު އަލީ އިހްސާން ވަނީ ވިދާޅުވެފައެވެ.