ކޯޓުތަކުން ހިދުމަތް ބައްޓަން ކުރަންވާނީ އެންމެންނަށް ފަސޭހަވާ ގޮތަށް ކަމަށް އުއްތަމަ ފަނޑިޔާރު ވިދާޅުވީ، ޝަރުޢީ ކޯޓުތަކުގެ ޗީފް އެޑްމިނިސްޓްރޭޓަރސް ކޮންފަރެންސް، ފެށުމުގެ ގޮތުން ބޭއްވި ރަސްމީއްޔާތުގައި ވާހަކަފުޅު ދައްކަވަމުންނެވެ. އަރިއަތޮޅު އުކުޅަހުގައި ކުރިއަށްދާ މި ކޮންފަރެންސްގެ ނަމަކީ "ކަފި" އެވެ.
"ކަފި" މި ނަމުގައި ދެދުވަހުގެ މުއްދަތައް ކުރިއަށް ގެންދާ ކޮންފަރެންސްއަކީ ކޯޓުތަކުގެ އިދާރީ ހިންގުން ހަރުދަނާކޮށް އިދާރީ ހިދުމަތްތައް ދިނުމުގައި ދިމާވާ ގޮންޖެހުންތަކާއި މެދު މަޝްވަރާކޮށް އެކަން ހައްލުކުރާނެ ގޮތްތަކެއް ތައާރަފްކުރުމަށް މަޝްވަރާކުރުމަށް ބާއްވާ ކޮންފަރެންސްއެކެވެ.
އުއްތަމަ ފަނޑިޔާރު ވިދާޅުވީ، ކޯޓުތަކުން ދެވޭ ހިދުމަތް ޒަމާނާއި އެއްގޮތަށް ބަދަލުކުރަން އިސްކަން ދޭން ޖެހޭކަމަށެވެ. " ދުނިޔެއަށް އަންނަ ބަދަލުތަކާއިއެކު އަޅުގަނޑުމެން ކުރާ މަސައްކަތް ބަދަލު ކުރަން ޖެހޭ. މިހާރަށް ވުރެ ބޮޑަށް އިންފޮމޭޝަން ޓެކްނޮލޮޖީގެ ބޭނުން ހިފަން ޖެހޭ. ދައުލަތުގެ އިދާރާތަކަށް އަންނަ ބަދަލުތައް ބަލައި އެ ބަދަލުތަކާއި އެއްވަރަށް އަޅުގަނޑުމެންވެސް ފައި ހަމަ ކުރަން ޖެހޭ"
ކޯޓު ތަކުގެ އެޑްމިނިސްޓްރޭޓަތުން އެއްތާކަށް އެއްވެ މި ގޮތަށް ބާއްވާ މިއީ ފުރަތަމަ ކޮންފަރެންސްއެވެ.
