މިއަދު އޮތް ނޫސްވެރިންގެ ބައްދަލުވުމެއްގައި ޝިޔާމް ވިދާޅުވީ، ފެލިވަރުގައި މަސް ބަންދުކުރާ މިންވަރު 100 ޓަނަށް ބަދަލުކޮށް ފިޔޯރީ އަދި ނިލަންދޫގައި ފެކްޓްރީ ގާއިމްކޮށް ނިމުމުން މިފްކޯއަށް ވަރަށް ބޮޑު ލުޔެއް ލިބިގެންދާނެ ކަމަށެވެ.
ޝިޔާމް ވިދާޅުވީ، ނިލަންދޫ އާއި ފިޔޯރީގައި މަސް ފެކްޓްރީ ގާއިމުކުރެވި އޮޕަރޭޝަނަށް އައުމުން ހޮރައިޒަންގެ 40 ޓަނާއި އެންސިސްގެ 25 ޓަނު ނުހިމަނާ ދައުލަތުގެ ޕްރޮސެސިން ކެޕޭސިޓީ އަހަރެއްގެ މައްޗަށް 80،000 ޓަނަށް އަރާނެ ކަމަށެވެ.
މި މަސައްކަތް ނިމި އޮޕަރޭޝަން ފެށުމުން ކަޅުބިލަމަހުން ރާއްޖެއަށް ލިބުމުންދާ އާމްދަނީ ދެގުނަ އިތުރުވެގެންދާނެ ކަމަށާއި، މިހާރު ކަޅުބިލަމަހުގެ އާމްދަނީގެ ގޮތުގައި ލިބެމުންދާ 92 މިލިޔަން ޑޮލަރު 190 މިލިޔަން ޑޮލަރަށް ބަދަލުވެގެން ދާނެ ކަމަށް ޝިޔާމް ވިދާޅުވި އެވެ.
މިފްކޯއަށް ދައުލަތުން މިއަހަރުގެ މިހާތަނަށް 1.2 ބިލިއަން ރުފިޔާ ހޭދަކޮށްފައިވެ އެވެ. އޭގެ ތެރެއިން ކިލޯއެއް 20ރ. އަށް ދޭން ފެށި ފަހުން ވެސް 560 މިލިއަން ރުފިޔާ ސަބްސިޑީއަށް އަރާފައިވެ އެވެ.
