މިއީ، މީގެ ހަތް އަހަރު ކުރިން ވ. ކެޔޮދޫ ދޭލިއާގެ، މޫސާ އަހްމަދު މަރާލި މައްސަލައިގައި ދައުވާ އުފުލި އިބްރާހީމް ސައްމާހު އަހުމަދު ފަތުހީ ބަންދުކޮށްދޭތޯ ޕީޖީން އެދިގެން ސުޕްރީމް ކޯޓަށް ހުށަހެޅި މައްސަލައެވެ. މި މައްސަލައިގައި ސައްމާހް ބަންދު ކުރަން ސުޕްރީމް ކޯޓުން ކުރިން އަމުރު ކުރިނަމަވެސް، ފަހުން އެހެން ބެންޗަކުން އެ މައްސަލަ ބަލައި، ނިންމީ ހައިކޯޓުގެ ހުކުމަށް ތާއީދުކޮށެވެ.
ސުޕްރީމް ކޯޓުން މި މައްސަލައިގައި މިއަދު އިއްވި ހުކުމުގައި ބުނެފައި ވަނީ، ހިނގަމުންދާ މައްސަލައެއްގައި ދައުވާ ލިބޭ މީހަކު ބަންދު ކުރަންޖެހޭ ސަބަބެއް އޮތްތޯ ކަނޑައެޅުމަކީ އެ މައްސަލަ ބައްލަވާ ފަނޑިޔާރުންނަށް ލިބޭ އިހުތިޔާރެއް ކަމަށެވެ. އެހެންކަމުން އެ އިހުތިޔާރުގެ ތެރެއަށް އިސްތިއުނާފީ ކޯޓުން ވަންނަން ޖެހޭ ފަދަ ހާލަތެއް ނެތް ކަމަށް ހުކުމްކޮށްފައިވެ އެވެ.
މޫސަ މަރާލި މައްސަލާގައި، ސައްމާހުގެ މައްޗަށް އުފުލާފައި ވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ އެވެ. ނަމަވެސް، ކްރިމިނަލް ކޯޓުން މިދިޔަ ޖެނުއަރީ މަހުގެ 23 ވަނަ ދުވަހު ހުކުމްކޮށްފައި ވަނީ އޭނާގެ މައްޗަށް ކުށް ސާބިތު ނުވާ ކަމަށެވެ.
އެ މައްސަލަ ދައުލަތުން ހައިކޯޓުގައި އިސްތިއުނާފު ކޮށްފައިވާއިރު، އިސްތިއުނާފް މަރުހަލާ ނިމެންދެން އޭނާ ބަންދު ކޮށްދިނުމަށް ވެސް ހައިކޯޓުގައި ދައުލަތުން އެދިފައިވެ އެވެ. ނަމަވެސް ދައުލަތުން އެދުނު ގޮތަށް ހައިކޯޓުން އެ އަމުރު ނެރެދީފައެއް ނުވެ އެވެ.
މޫސަގެ މަރުގެ މައްސަލާގައި އިތުރު ތިން މީހެއްގެ މައްޗަށް ދައުލަތުން ދައުވާ ކުރި އެވެ. އެއީ ސ. ހިތަދޫ, މުޑުދާސްގެ، އަލީ ހަސަން އާއި ނ. ޅޮހީ، ކަނީރުމާގެ، މުހައްމަދު ރިޔާޒު އަދި މ. ދިއްގަރު، ދެބުދާރުގެ، އަހުމަދު އިޖާދު މުހައްމަދުގެ މައްޗަށެވެ. މީގެ ތެރެއިން ކުށް ސާބިތުވެފައި ވަނީ އަލީ ހަސަންގެ މައްޗަށް އެކަންޏެވެ. އޭނާ 15 އަހަރަށް ޖަލަށް ލާން ކްރިމިނަލް ކޯޓުން ވަނީ ހުކުމް ކޮށްފަ އެވެ.
މި މައްސަލައިގައި ކުށް ސާބިތު ނުވާކަމަށް ކަނޑައަޅާފައިވާ ރިޔާޒާއި އިޖާދުގެ މައްސަލަ ވެސް ދައުލަތުން ވަނީ ހައިކޯޓުގައި އިސްތިއުނާފް ކޮށްފަ އެވެ.
