ފުށިދިށްގަރު ފަޅު މިއަދު އަލުން ހިއްކަން ފަށާފައިވާއިރު ފުށިދިއްގަރު ފަޅު ހިއްކައިގެން ތަރައްގީކުރާ "ރަސްމާލެ" ހިއްކުމުގެ މަޝްރޫއު މިމަހު ތެރޭގައި އަލުން ފަށާނެ ކަމަށް ރައީސް ޑރ.މުއިއްޒު ވިދާޅުވީ މިދިޔަ މަހު ޕީއެންސީ ހަރުގެ ހުޅުވުމުގެ ރަސްމިޔާތުގަ އެވެ.
މިއަދު މިމަޝްރޫއު ފަށަފައިވާއިރު އެދުވަހުގެ ވާހަކަފުޅުގައި ރައީސް މުއިއްޒު ވަނީ މިއަހަރުގެ ޑިސެމްބަރުގެ ނިޔަަލަށް 1،100 ހެކްތަރުގެ ބިން ހިއްކާ ނިމޭނެ ކަމުގެ ޔަގީންކަން ދެއްވާފަ އެވެ.
ރަސްމާލެ ހިއްކުމުގެ މަސައްކަތް ކުރިއަށް ގެންދަން އެހެން ގޮތެއް ހޯދުމުގެ މަސައްކަތް ފަށާފައިވާ ކަމަށާއި އެކަމަށް އަލި މަގެއް ވެސް ލިބިފައިވާ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބު މި ފަހުން ވަނީ ވިދާޅުވެފަ އެވެ.
މި މަޝްރޫއު ކުރިއަށް ގެންދަން ކުރިމަތިވި އެންމެ ބޮޑު ގޮންޖެހުމަކީ މި އަހަރަށް ލަފާކުރި ބަޖެޓުގައި ރަސްމާލެ މަޝްރޫއަށް ހިމަނަން އެދުނު ފައިސާ އުނިކުރުން ކަމަށާއި ބަޖެޓުގައި ނެތުމުން އިތުރު ގޮތަކަށް އެ މަސައްކަތް ކުރިއަށް ގެންދަން ޖެހިފައިވާކަން މިނިސްޓަރު ފާހަގަކުރެއްވި އެވެ.
ރަސްމާލެ"ގެ ނަމުގައި ފުށިދިއްގަރުފަޅު ތަރައްގީކުރަން ނިންމައި ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އާ ގުޅިގެން އެ ތަން ހިއްކަން ފެށީ 18 ޑިސެމްބަރުގަ އެވެ.
ކ. ގުޅީ ކައިރީގައި އޮންނަ ފުށިދިއްގަރު ފަޅުން 1،153 ހެކްޓަރުގެ ބިން ހިއްކާނެ ކަމަށާއި މަސައްކަތް ތާވަލާ އެއްގޮތަށް ދާ ނަމަ، އަށް މަސް ތެރޭ ހިއްކައި ނިމޭނެ ކަމަށް ރައީސް މުއިއްޒު ވަނީ ކުރިން ވިދާޅުވެފަ އެވެ. އަދި މާލެއިން ފުރައިގެން 17 ވަރަކަށް މިނެޓުން ދެވޭ ރަސްމާލެ އާއި މާލެ ގުޅާލާނީ ކަނޑުއަޑީގެ ޓަނަލް އަކުން ކަމަށް ވެސް ރައީސް މުހައްމަދު މުއިއްޒު މިފަހުން ވަނީ ވިދާޅުވެފަ އެވެ.
