އެމްޑީޕީގެ ޕާލަމެންޓްރީގެ ގްރޫޕުން މިއަދު ބޭއްވި ނޫސްވެރިންގެ ބައްދަލުވުމެއްގައި، އެ ޕާޓީން ވަނީ ސަރުކާރުގެ ރިފޯމް އެޖެންޑާގައި ހުރިކަންކަމަށް ތާއީދު ކުރާނެކަމަށް ބުނެފަ އެވެ. 

އެގޮތުން ސަރުކާރުގެ ފަރާތުން ހުށައަޅަފައިވާ އިގުތިސޯދާ ގުޅުންހުރި 3 ބިލަށްވެސް އެޕާޓީން ތާއިދުކުރާނެކަމަށް ބުންޏެވެ.

ނަމަވެސް، އެމްޑީޕީން ތާއީދު ނުކުރާ ކަމަކީ މަހުގެ އަގު ދަށްކުރުން ކަމަށް އޭނާ ވިދާޅުވި އެވެ. ބައިނަލްއަގުވާމީ މާލީ އިދާރާތަކުން ދޭ ލަފަޔާ އެއްގޮތަށް ކަންކަން ކުރާ ނަމަ އެމްޑީޕީގެ އެމްބާރުން ސަރުކާރަށް ލިބޭނެ ކަމަށް ޝަމްހީދު ވިދާޅުވި އެވެ.

މި ނޫސްވެރިންގެ ބައްދަލުވުމުގައި ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވީ ގައުމުގެ އިގުތިސޯދީ ހާލަތުން އަރައިގަތުމަށް ވަކި ތަރުތީބަކުން މަސައްކަތްތަކެއް ކުރަންޖެހޭކަމަށެވެ.

ރާއްޖޭގެ އިގްތިސޯދީ ހާލަތު މިހާރު އޮތް ގޮތުން ސަރުކާރުން ވަނީ ހަރަދު ކުޑަކުރުމުގެ ގޮތުން ގިނަ ފިޔަވަޅުތަކެއް އެޅުމަށް ނިންމާފަ އެވެ. އެގޮތުން ކުރިއަށް މިއޮތް މިނިވަން ދުވަހުގެ ހަރަކާތްތައް ވެސް ނުބޭއްވުމަށް ރައީސް ޑރ. މުހައްމަދު މުއިއްޒު ވަނީ ނިންމަވާފަ އެވެ.

މިއަދުގެ ނޫސްވެރިންގެ ބައްދަލުވުމުގައި އެމްޑީޕީގެ ޕީޖީ ގުރޫޕުން ވަނީ ސަރުކާރުގެ ސިޔާސީ މަގާމުތަކަށް އައްޔަނުކޮށްފައި ތިބި މީހުންގެ އަދަދު ހާމަ ކުރުން ލާޒިމުވާ ގޮތަށް ގަލޮޅު ދެކުނު ދާއިރާގެ މެންބަރު، މީކާއިލް އަހުމަދު ނަސީމު މިއަދު މަޖިލީހަށް ހުށަހެޅުއްވި ކުއްލި މައްސަލަ ބޭރު ކޮށްލުމުން ކަންބޮޑުވުން ފާޅު ކޮށްފަ އެވެ.

މީކާއިލް ހުށަހެޅުއްވި ބިލު ބަލައިގަތުމަށް ވޯޓު ދިނީ އެމްޑީޕީގެ 11 މެންބަރުން އެކަންޏެވެ. މައްސަލަ ބަލައިގަތުމާ ދެކޮޅަށް 56 މެންބަރަކު ވޯޓު ދިނެވެ.