ޑައިބެޓިކް ސޮސައިޓީގެ އަހަރީ ދުވަސް ފާހަގަ ކުރަން ބޭއްވި ރަސްމިއްޔާތުގައި ސާޖިދާ ވިދާޅުވީ ހަކުރު ބައްޔަކީއޭގެ ޒާތުގައި އިންސާނާގެ އެތެރެ ހަށީގެ ހިނގުމަށް ހަމަލާދޭ ގުނަވަންތައް ފެއިލްކޮށްލާ ފަދަ ބައްޔެއްކަމުން މިކަމުގައި މިހާރަށްވުރެ ބޮޑަށް ސަމާލުވާންޖެހޭކަމަށެވެ.
ސާޖިދާ ވިދާޅުވީ ހަކުރުބަލީގެ ޝިކާރަކަށް ވިޔަ ނުދިނުމަށްޓަކައި ކުރެވިދާނެ ތިން ކަމެއް ފާހަގަކުރެއްވި އެވެ. އެ ތިން ކަމަކީ، ކޮންމެ މީހަކީ މި ބައްޔާމެދު އަމިއްލައަށް މައުލޫމާތު ހޯދާ މީހަކަށްވުމާ، ލިބޭ މައުލޫމާތާ އެއްގޮތަށް ދިރިއުޅުމުގެ އާދަތައް ބަދަލުކޮށް އިސްލާހުކުރުމާ، ހަކުރުބަލި ތަޙައްމަލުކުރަން ޖެހިފައިވާނަމަ ފަރުވާހޯދައި، އަމިއްލަ ހަށިގަނޑަށް ފަރުވާތެރިކަމާއި ސަމާލުކަންދިނުން ކަން ފާހަގަ ކުރެއްވި އެވެ.
ރާއްޖޭގައި ހަކުރު ބަލި ތަހައްމަލްކުރަމުންދާ 21 ކުޑަ ކުއްޖެއްގެ ކޭސް ރެކޯޑު ކުރެވިފައިވާ ކަމަށް ވިދާޅުވެ، ފަސްޑް ލޭޑީ ވިދާޅުވީ، ރާއްޖޭގައި ކުރިން ގިނައީ ގައިން ގަޔަށް އަރާ ބަލިތައް ކަމަށާއި މިހާރު އެ ބަދަލުވެފައި ވަނީ ގައިން ގަޔަށް ނާރާ، އެހެން ނަމަވެސް ދިރިއުޅުމުގެ އާދަކާދަ ހުންނަ ގޮތުން ތަހަންމަލް ކުރަން ޖެހޭ ބަލިތައް ކަމަށް އެކަމަނާ ވިދާޅުވި އެވެ.
އެކަމަނާ ވިދާޅުވި ގޮތުގައި، ކޮންމެ 10 މީހުންގެ ތެރެއިން އެކަކު ހަކުރު ބަލީގެ ޓައިޕް 2ގެ ވޭން އުފުލަމުން ދިއުމަކީ ރާއްޖޭގެ ނިސްބަތުން ސަމާލުކަން ވަރަށް ބޮޑަށް ދޭން ޖެހޭ ވަރުގެ ހިސާބުތަކެެކެވެ.
ޑައިބެޓިކް ސޮސައިޓީގެ އަހަރީ ދުވަސް ފާހަގަކުރުމުގެ ރަސްމިއްޔާތު. -- ފޮޓޯ: ރައީސް އޮފީސް
މިރަސްމިއްޔާތުގައިވަނީ ރާއްޖޭގައި ހަކުރު ބަލި އޮތް މިންވަރު ދެނެގަތުމަށް ކުރިއަށްގެންދެވިފައިވާ ދިރާސާތަކުގެ މައުލޫމާތު ހިއްސާކޮށްފަ އެވެ. އަދި ރާއްޖޭގައި ހަކުރުބަލީގެ ނުރައްކާ އޮތް މިންވަރު މިމައުލޫމާތުންވަނީ ހާމަވެފަ އެވެ.
މީގެއިތުރުން މިރަސްމިއްޔާތުގައި މުޅި ރާއްޖޭގައި ހަކުރުބައްޔަށް ސްކްރީން ކުރުމަށް ކުރިޔަށްގެންދިޔަ ޕްރޮގްރާމުން ލިބިފައިވާ މަޢުލޫމާތުތަކުގެ މައްޗަށް ބިނާކޮށް ތައްޔާރުކޮށްފައިވާ ތަފާސް ހިސާބުތަކުގެ ފޮތެއް ވެސް ވަނީ ނެރެފަ އެވެ. މި ފޮތް ނެރެދެއްވީ ފަސްޓް ލޭޑީ ސާޖިދާ މުހައްމަދު އެވެ.
