މާލެ ވޭސްޓް ޓްރާންސްފާ ސްޓޭޝަންގައި ބޭއްވި ރަސްމިއްޔާތުގައި މި ހިދުމަތް ފެށުމުގެ ގޮތުން ވެމްކޯއާއެކު ކޮރާ ކޮރާ މޯލްޑިވްސް ރިސޯޓުން ވަނީ އެއްބަސްވުމެއްގައި ސޮއިކޮށްފަ އެވެ.
ވެމްކޯ އިން ބުނީ ރިސޯޓް ކަލެކްޝަންގެ ހިދުމަތް ވެމްކޯ އިން ފެށީ ރިސޯޓްތަކުން، ވެމްކޯގެ ސަރަޙައްދީ ޓްރާންސްފާ ސްޓޭޝަންތަކަށް ކުނި ގެންދިޔުމުގައި ގޮންޖެހުންތަކަކާ ކުރިމަތިލާންޖެހޭތީ، މި މައްސަލަ ހައްލުކުރުމުގެ ގޮތުން ކަމަށެވެ. މި ޙިދުމަތަށް ރަޖިސްޓްރީކުރާ ހުރިހާ ރިސޯޓްތަކަށްވެސް ވެމްކޯގެ އުޅަނދުތަކުގައި ކުނި ނަގައިދޭނެ ކަމަށް އެ ކުންފުނިން ބުނެ އެވެ.
މި ރަސްމިއްޔާތުގައި ވާހަކަދައްކަވަމުން ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވީ މިހާތަނަށް އައިރު، ރިސޯޓުތަކުން ކުނި އުކަނީ އަމިއްލަ ފަރާތްތަކާ ހަވާލުކޮށްގެން ކަމަށެވެ. އަދި މިއީ ދެމެހެއްޓެނިވި ގޮތެއްގައި ރިސޯޓުތަކުން އުފައްދާ ކުނި މެނޭޖްކުރަން އެންމެ ރަނގަޅު ގޮތް ނޫންކަން މިނިސްޓަރު ފާހަގަކުރެއްވި އެވެ.
ވެމްކޯއިން ކުނި އުކައިދެނީ މިޚިދުމަތުގައި ރަޖިސްޓްރީވާ ރިސޯޓުތަކަށް އެކަންޏެވެ. މިނިސްޓަރު ވަނީ ހުރިހާ ރިސޯޓުތަކުންވެސް ވެމްކޯގެ ކުނި އުކައިދިނުމުގެ ހިދުމަތުގައި ބައިވެރިވުމަށް އެދިވަޑައިގެންފަ އެވެ.
އެންވައިރުމެންޓް މިނިސްޓަރު ތޯރިގު އިބްރާހިމް މީގެ ކުރިން ވިދާޅުވެފައިވަނީ ބައެއް ރިސޯޓްތަކުން ކުނި މެނޭޖުކުރުމުގެ ކަންކަން އެންމެ ރަނގަޅަށް ތަންފީޒުކުރަމުން ނުދާކަމަށާއި މި މައްސަލަ ބޮޑަށް ކުރިމަތިވަނީ ރިސޯޓްތަކުން ކުނި އުކާލަން ހަވާލުކުރާ ކޮންޓްރެކްޓަރު، މޫދަށް ކުނި އެޅުން ނުވަތަ ޓްރާންސްފަރ ސްޓޭޝަނާ ހަމައަށް އެކަށީގެންވާ ގޮތުގައި އެ ކުނިތައް ނުގެންދާތީ ކަމަށެވެ.
