މި ފިހާރަ ހުޅުވާދިނީ "މޫސާ އާޓްސް"ގެ ވެރިފަރާތް ކަމަށްވާ މޫސާ ހަސަން އެވެ. އޭނާ އަކީ ތޮއްޑޫ ފިހާރައަށް ތޮއްޑޫގެ ސަޕްލަޔަރެއްގެ ހައިސިއްޔަތުން އެންމެ ފުރަތަމަ، މުދާ ސަޕްލައި ކުރި ވިޔަފާރިވެރިޔާކަމަށް ބީސީސީ ބުނެއެވެ.
މި ފިހާރަ ހުޅުވުމަށްފަހު، އެ ފިހާރައިން އެންމެ ފުރަތަމަ ވިޔަފާރި ކުރީ ބީސީސީގެ މެނޭޖިން ޑިރެކްޓަރ އިބްރާހިމް ޒިޔާއު މުހައްމަދުއެވެ. އޭނާ ވަނީ ތޮއްޑޫގެ ސަޕްލަޔަރެއްގެ ދިވެހި އުފެއްދުމެއް ގަތުމަށްފަހު ތޮއްޑޫ ކައުންސިލްގެ ރައީސަށް ހަދިޔާކޮށްފައިކަމަށް ބީސީސީންް ބުނެއެވެ.
ތޮއްޑޫގައި ހުޅުވި އޮތެންޓިކް މޯލްޑިވްސްގެ ފިހާރަ ހުޅުވުމުގެ ތެރެއިން
ފިހާރަ ހުޅުުވުމަށްް ބޭއްވި ރަސްމިއްޔާތުގައި ވާހަކަދައްކަވަމުން ޒިޔާއު ވިދާޅުވީ، އަމާޒަކީ ދިވެހި އުފެއްދުންތެރިން އުފައްދާ ތަކެތި ރާއްޖެއާއި ރާއްޖެއިން ބޭރުގައި މާކެޓުކޮށް ވިއްކޭނެ ފަހި ފުރުސަތުތަކެއް ހޯދައި ދިނުން ކަމަށެވެ. ރާއްޖެއާއި ރާއްޖެއިން ބޭރުގައި ހުރި އެފަދަ ފުރުސަތުތައް ބަލައި އެކަން ފަހި ކުރެވޭނެ ގޮތްތައް ހޯދަމުން ދާކަމަށް ޒިޔާއު ވިދާޅުވިއެވެ.
އޮތެންޓިކް މޯލްޑިވްސް ތޮއްޑޫ ފިހާރަ ހުޅުވުމަށް ފަހު އެ ފިހާރައިން މިއަދު ވިޔަފާރިކޮށްގެން ލިބޭ އާމްދަނީގެ 20 އިންސައްތަ ފަލަސްތީނަށް އެހީވުމަށް ހަދިޔާ ކުރަން ނިންމާފައިވާކަމަށް ބީސީސީން ބުނެއެވެ.
ތޮއްޑޫގައި ހުޅުވި އޮތެންޓިކް މޯލްޑިވްސްގެ ފިހާރަ ހުޅުވުމުގެ ތެރެއިން
ތޮއްޑޫގައި ހުޅުވި އޮތެންޓިކް މޯލްޑިވްސް ފިހާރަގެ ސަބަބުން، އެ ސަރަހައްދުގައި ހަރަކާތްތެރިވާ އުފެއްދުންތެރިންނަށް އައު ބާޒާރުތަކަށް ފުރުސަތު ހުޅުވި، ސަރަހައްދުގެ އިގްތިސާދު ތަރައްޤީ ވުމަށް މަގުފަހި ވެގެންދާނެ ކަމަށް ބީސީސީން ބުނެއެވެ. އަދި މިއީ ތޮއްޑޫއަށް ޒިޔާރަތްކުރާ ފަތުރުވެރިންގެ މެދުގައި ދިވެހިންގެ އުފެއްދުންތަކަށް އޮންނަ ޝައުގުވެރިކަން ވެސް އިތުރުވެގެންދާނެ ކަމެއްކަމަށްވެސް ބީސީސީން ބުނެއެވެ.
ތޮއްޑޫގައި ހުޅުވި އޮތެންޓިކް މޯލްޑިވްސްގެ ފިހާރަ ހުޅުވުމުގެ ތެރެއިން
ވޯލްޑް ބޭންކުގެ، މީރީ ޕްރޮޖެކްޓުގެ އެހީތެރިކަމާއެކު ތޮއްޑޫގައި ހުޅުވި މި ފިހާރަ އަކީ އޮތެންޓިކް މޯލްޑިވްސް މަރުކާގެ ދަށުން ބީސީސީން ހުޅުވި 5 ވަނަ ފިހާރައކެވެ. ތޮއްޑޫގެ އިތުރުން، މާލެ، ކްރޮސްރޯޑްސް، ވެލާނާ އިންޓަނޭޝަނަލް އެއާޕޯޓް، އަދި ގަން އިންޓަނޭޝަނަލް އެއާޕޯޓުގައި އޮތެންޓިކް މޯލްޑިވްސްގެ ފިހާރަތައް ވަނީ ހުޅުވާފައެވެ. މި ފިހާރަތަކުގައި 300 އަށް ވުރެ ގިނަ ދިވެހި މަސައްކަތްތެރިންގެ، 5000އަށްވުރެ ގިނަ އުފެއްދުންތައް މިހާރު ވިައްކަމުންދާކަމަށް ބީސީސީން ބުނެއެވެ. އަދި މި މަރުކާގެ ދަށުން ދިވެހި އުފެއްދުންތައް ރާއްޖެއާއި ރާއްޖެއިން ބޭރުގައި މާކެޓް ކުރުމަށް ކުރަމުންދާ މަސައްކަތުގެ ދަށުން ޖަޕާނުގައިވެސް ދިވެހި އުފެއްދުންތައް ވިއްކޭނެ ގޮތް ވަނީ ހަމަޖައްސާފައިވާކަމަށްވެސް ބީސީސީން ބުނެއެވެ.
