ޖަޕާނު ސަރުކާރުން ހަދިޔާކުރި ތަކެތީގެ ތެރޭގައި 54 ޕޮލިސް ކާރާއި، 4 ޓޮޔޯޓާ ވޭން ހިމެނެ އެވެ. އެތަކެތީގެ އަގު 4 މިލިއަން އެމެރިކާ ޑޮލަރު ނުވަތަ 61.7 މިލިއަން ރުފިޔާއަށް އަރާ ކަމަށް ފުލުހުންގެ ހިދުމަތުން ބުނެ އެވެ.
މިތަކެތި ދިވެހި ފުލުހުންގެ ހިދުމަތާ ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވީ މުޖުތަމަޢުގައި ކުށްކުރުން އިތުރުވަމުންދާއިރު، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރަން ކުރަންޖެހޭ މަސައްކަތްތައްވެސް އިތުކުރަންޖެހިފައިވާކަމަށެވެ.
ޖަޕާން ސަރުކާރުން ދިވެހި ފުލުހުންގެ ހިދުމަތަށް ހަދިޔާކުރި އެއްގަމު އުޅަނދު - ފޮޓޯ: ޕޮލިސް
މި ރަސްމިއްޔާތުގައި ވާހަކަފުޅު ދައްކަވަމުން ޖަޕާން ސަފީރު ވިދާޅުވީ، މީ ޖަޕާނު ސަރުކާރުން ލޯ އެންފޯސްމެންޓަށް ސަޕޯޓުދޭން ބޭނުންވާކަމުގެ ހެއްކެއްކަމަށާއި މިކަމުގެ ސަބަބުން ފުލުހުންގެ މަސްއޫލިއްޔަތު އެންމެ ފުރިހަމަ ގޮތުގައި އަދާކުރަން ފަސޭހަވާނެކަމަށެވެ.
އެގޮތުން ފުލުހުން ހިންގާ ޓްރެފިކް އޮޕަރޭޝަންތަކަށް އިތުރު ކުރިއެރުމެއް ލިބޭނެކަމަށް އުންމީދުކުރައްވާ ކަމަށާއި އަދި ކުރިއަށް އޮތްތަނުގައި އެހެނިހެން ވަސީލަތްތައް ވެސް ޖަޕާނު ސަރުކާރުން ފުލުހުންނަށް ފޯރުކޮށްދޭނެ ކަމަށް ވިދާޅުވި އެވެ. އެގޮތުން މެޓަލް ޑިޓެކްޓަރ، ލޭސަރަރ، ޕެސެންޖަރ ކްރާފްޓު އަދި ރަބަރ ބޯޓު ފަދަ ތަކެތި ހަދިޔާކުރައްވާނެ ކަމަށް ސަފީރު ވިދާޅުވި އެވެ
މީގެ ކުރިން ވެސް ޖަޕާނުން ފުލުހުންނަށް އެކި ކަހަލަ އެހީތައް ދީފައިވާ އިރު، އެ ގައުމަކީ ރާއްޖެ އަށް ތަފާތު ގޮތްގޮތުން އެހީވަމުން އަންނަ ގައުމެކެވެ.
