މި ދަތުރުތަކުގެ ފުރަތަމަ މަންޒިލެއްގެ ގޮތުގައި ކަނޑައަޅާފައިވަނީ އިދިކޮޅު އެމްޑީޕީގެ ސަޕޯޓް އެންމެ ބޮޑު ދެކުނުގެ އަތޮޅުތައްކަމަށްވާ އައްޑޫ ސިޓީއާއި ފުވައްމުލައް އަދި ތިނަދޫ ސިޓީގެ އިތުރުން ހުވަދޫ އަތޮޅުގެ ހުރިހާ ދާއިރާތައް ހިމެނޭ ރަށްތަކަށެވެ.
މިދަތުރުގައި އެމްޑީޕީގެ ޗެއާޕާސަން ފައްޔާޒު އިސްމާއިލް، ޗެއާޕާސަންގެ ނައިބު އަހުމަދު އަބްދުالله އަދި ޕާލިމަންޓަރީ ގްރޫޕުގެ ލީޑަރ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ބައިވެރިވެވަޑައިގަންނަވައެވެ.
އެމްޑީޕީން ބުނީ ރައްޔިތުންގެ މަޖިލީހުގެ އިންތިހާބަށްފަހު ޕާޓީގެ ހިންގުން ހަރުދަނާ ކުރުމަށް ވަނީ ގިނަ މަސައްކަތްތަކެއް ފަށާފައިކަމަށެވެ. މިގޮތުން އެމްޑީޕީ އަކީ އިންތިޒާމުވެގެން ހިންގާ މުއައްސަސާއަކަށް ހެދުމަށް ޕާޓީގެ އޮނިގަނޑަށާއި އަސާސީ ޤަވާއިދަށް ބަދަލުތަކެއް ގެނައުމަށް މަގުޗާޓެއް އެކެލަވާފައިވާކަމަށް އެޕާޓީން ބުނެއެވެ.
މި ސިލްސިލާ ދަތުރުތަކުގެ މައިގަނޑު މަޤްސަދަކީ ޕާޓީގެ ކުރިމަގު ހަރުދަނާ ކުރުމަށް ކުރާ މަސައްކަތްތަކަކީ އާންމު މެމްބެރުންގެ ބައިވެރިވުމާ ހިޔާލާ މަޝްވަރާއާއެކު ކުރެވޭ މަސައްކަތްތަކެއްކަން ކަށަވަރުކުރުންކަމަށް އެމްޑީޕީން ބުނެއެވެ.
