ވިޔަފާރި ވެރިއަކާ ވާހަކަ ދައްކާލާ ހިޔާލު ހޯދާލީމެވެ. "އަހަރުމެން ބޭރުން މުދާ ގަންނަން ހުރަސްތަކެއް ހުރޭ. ޑޮލަރު ނުލިބި، އަގުބޮޑުކޮށް ގަތީމަ ތިމަންނަ މުދާ ވިއްކަން މިޖެހެނީ އަގު ބޮޑުކޮށް. އާންމުންނަށް އެންމެފަހުން ގެއްލުން މިވަނީ. އިގްތިސާދުވެސް ދާނީ ތިރިއަށްތާ މިހެން ވީމަ،" އޭނާ ބުންޏެވެ.
މީގެ އިތުރުން އިގްތިސާދީ މާހިރެއްގެ ހިޔާލުވެސް ހޯދާލީމެވެ. މިކަން މިހެން ހިނގަން ދިމާވާ ސަބަބު އަހާލުމުން ވިދާޅުވީ މައިގަނޑު ކަމެއް ކަމަށް ފެންނަނީ ރާއްޖޭގާ ރިސޯޓު ތަކުން އެއްޗެހި އެތެރެ ކުރުމަށް ރާއްޖޭގެ މައި ބޭންކު، ބީ.އެމް.އެލް، ގެ އެކައުންޓް ބޭނުން ނުކޮށް، ބޭރުގެ ބޭންކުތަކުން މާލީ މުއާމަލާތްތައް ހިންގާތީވެ ކަމަށެވެ.
އެމްއެމްއޭގެ ގާނޫނުގައި ވާ ފަދައިން ފައިސާ ބަދަލު ކުރާ ފަރާތް ތަކުން ކަން ކުރިކަމުގައި ވިޔަސް، އެމްއެމްއޭ އިން އަޅަން ޖެހޭ ފިޔަވަޅު ނޭޅި ދާތީވެސް މިކަން އިތުރަށް ގޯސް ވާކަމަށް އޭނާ ވިދާޅުވި އެވެ. އެމްއެމްއޭގެ ޤާނޫނު ބުނާ ގޮތުން އެމްއެމްއޭ އިން ކަނޑައަޅާފައިވާ ރޭޓު ފެންނަ ގޮތަށް އިޝްތިހާރު ކުރެވިފާ ހުންނަން ޖެހެ އެވެ. ފައިސާ ބަދަލު ކުރާ ފަރާތްތަކުން ކޮމިޝަނެއްގެ ގޮތުގާ ވަރެއް ނެގުމަކީ ހުއްދަ ކަމެކެވެ. ނަމަވެސް އެމްއެމްއޭގެ މި ރޭޓް ފައިސާ ބަދަލު ކުރަން އަންނަ ކޮންމެ މީހަކަށްވެސް އިނގިފައޮންނަންޖެހޭނެ ކަމަށާއި، މީގެ އިތުރުން މި ރޭޓް އަށް އިތުރު ކުރިވެގެން ނުވާނެ ކަމަށް އެމްއެމްއޭގެ ގާވާއިދު ބުނެ އެވެ.
އިތުރަށް ކޮވިޑް-19 ގެ ބަލިމަޑުކަމުގެ ތެރޭގައިވެސް މިހާވަރަށް ޑޮލަރުގެ އަގު އުފުލިގެން ނުދިޔައީ ކީއްވެތޯ ސުވާލު ކޮއްލުމުން އެބޭފުޅާ ވިދާޅުވީ މިހާރު ފެނިގެން މިދަނީ އޭރުގެ އަސަރުތައް ކަމަށެވެ. ކޮވިޑް ތެރޭ ނަގާފައަިވާ ލޯނު ތަކުގެ ގްރޭސް ޕީރިއަޑް ހަމަވެ، އިގްތިސާދު ހީނަރުވާން ފަށާފަ ވަނިކޮށް އެ ދަރަނި ދައްކަން ޖެހުމުން، އެމްއެމްއޭގެ ރިޒާވްގައި ހުރި ޑޮލަރުގެ ބޭނުން ހިފަން ޖެހުމުން ޑޮލަރުގެ އަގު މަތިވާ ކަމަށް ވެސް އެބޭފުޅާ ވިދާޅު ވިއެވެ.
