ސުޕީރިއާ ކޯޓުތަކަކީ، ކްރިމިނަލް ކޯޓާ، ސިވިލް ކޯޓާ، ފެމިލީ ކޯޓާ، ޖުވެނައިލް ކޯޓު އަދި ޑްރަގް ކޯޓެވެ. މިނިވަން ދުވަހުގެ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ނަނާ ހުވަފެނަކަށް ވެފައި އޮތް އޮތުން ބަދަލުކޮށް، ސުޕީރިއާ ކޯޓުތަކުގެ އިމާރާތުގެ މަސައްކަތް އަންނަ އަހަރު ފަށާނެ ކަމަށެވެ. އަދި ރައީސް ވިދާޅުވީ ޝަރުއީ ދާއިރާއަށް އޮތީ ވަރަށް އިހުމާލުވެފައި ކަމަށާއި ނަމަވެސް، މި ސަރުކާރުން އެ ދާއިރާއަށް ދޭން ޖެހޭ ސަމާލުކަން ދޭނެ ކަމަށެވެ.
ޝަރުއީ ދާއިރާގެ ދާއިމީ އިމާރާތެއްގެ ގޮތުގައި މިހާރު ހުރީ ޖަސްޓިސް ބިލްޑިންގް އެކަންޏެވެ. ސިވިލް ކޯޓާއި ފެމިލީ ކޯޓުގެ އެއް ބައި ހިންގަނީ ވެސް ވަރަށް ބޮޑަށް ބާވެ، ޖާގަ ދަތިވެފައިވާ އިމާރާތެއްގަ އެވެ.
2021 ވަނަ އަހަރުގެ ދައުލަތުގެ ބަޖެޓުގައިވެސް ކޯޓް ކޮމްޕްލެކްސް ޖެހިއެވެ. މާލެ ކޯޓް ކޮމްޕްލެކްސް އިމާރާތް ކުރުމަށް އޭރު 12.4 މިލިއަން ރުފިޔާގެ ބަޖެޓެއް ކަނޑައަޅާފައިވާއިރު، އެ މަޝްރޫއަށް ތިން އަހަރުގެ ތެރޭގައި 24.9 މިލިއަން ރުފިޔާ ހަރަދު ވާނެ ކަމަށް ވަނީ ލަފާކޮށްފައެވެ. އެ މުއްދަތު ނިމެންދާއިރުވެސް އެއްވެސް އަމަލީ މަސައްކަތެއް ނުކުރެއެވެ.
