މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ބުނީ މެލޭޝިއާ ފްލައިޓްގެ ދަތުރުތައް އަލުން ފަށާައިރު ފުރަތަމަ ބޯޓް އަންނަ ބުރާސްފަތި ދުވަހު ރާއްޖެ އަންނާނެކަމަށެވެ.
މެލޭޝިއާ އެއާލައިންގެ ދަތުރުތައް އަލުން ރާއްޖެއަށް ފަށާއިރު ހަފްތާގެ ކޮންމެ ދުވަހަކު ދަތުރުތައް އޮންނާނެކަމަށް އެމްއޭސީއެލުން ބުނެއެވެ. އަދި ރާއްޖެއަށް ކުރާ ދަތުރުތަކުގައި ބޭނުންކުރާނީ ބޮއިން 737 ޑޭޝް 8 މަރުކާގެ 174 ސީޓުގެ ފްލައިޓެއް ކަމަށްވެސް އެމްއޭސީއެލުން ބުނެއެވެ.
މެލޭޝިއާ އެއާލައިްގެ ފުރަތަމަ ފްލައިޓަށް މަރުހަބާ ކިޔުމަށް ހާއްސަ ރަސްމިއްޔާތެއް ބޭއްވުމަށް އެމްއޭސީއެލުން ވަނީ ނިންމާފައެވެ. މި ރަސްމިއްޔާތުގައި ޓުއަރިޒަމް މިނިސްޓްރީ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް)، މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމް.އެމް.ޕީ.އާރް.ސީ) އަދި މެލޭޝިއާ އެއާލައިންސްގެ އިސްބޭފުޅުން ބައިވެރިވާނެކަމަށް އެމްއޭސީއެލުން ބުނެއެވެ.
މެލޭޝިއާ އެއަރލައިންސް އިން ދިވެހިރާއްޖެއަށް އެންމެ ފަހުން ދަތުރު ކޮށްފައިވަނީ 2017 ވަނަ އަހަރުއެވެ.
މެލޭޝިއާ އެއާލައިންގެ ދަތުރުތައް ރާއްޖެއަށް ހުއްޓާލީ 2014 ވަނަ އަހަރުގެ މާޗު އަށް ވަނަ ދުވަހު މެލޭޝިއާއިން ޗައިނާއަށް ދަތުރުކުރަނިކޮށް ގެއްލުނު މެލޭޝިއާގެ އެއާލައިންސް އެމްއެޗް 370 މަތިންދާ ބޯޓުހެ ހާދިސާއަށް ފަހު ވިޔަފާރީގައި ދިމާވި ކަންތައްތަކަށްފަހުއެވެ.
