އެންވަޔަރަމަންޓް މިނިސްޓްރީން މިއަދު ކުރި އިއުލާނުގައި ބުނެފައިވާ ގޮތުން އެއީ ވޯލްޑް ބޭންކްގެ އެހީގައި ހިނގަމުންދާ މަޝްރޫއެކެވެ.
މިއީ ވޯލްޑް ބޭންކުގެ އެހީގައި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ ން ހިންގާ އެކްސަލަރޭޓިންގ ރިނިއުވަބަލް އެނަރޖީ އިންޓަރގްރޭޝަން އެންޑް ސަސްޓެއިނަބަލް އެނާރޖީ - އެރައިސް ޕްރޮޖެކްޓްއިން ހިންގާ މަޝްރޫއެކެެވެ.
އެ މަޝްރޫއުގެ ދަށުން އިންވެސްޓަރުން ހޯދަނީ ޑިޒައިން، ބިލްޑް، ފައިނޭންސް، އޯން، އޮޕަރޭޓް، ޓްރާންސްފާގެ އުސޫލުންނެވެ. އޭގެ މާނައަކީ އެ ނިޒާމު ފަރުމާ ކުރުމާއި ގާއިމުކޮށް އަދި ހިންގުމުގެ ޝައުގުވެރިކަން އޮތް ފަރާތެއް ހޯދުމެވެ.
މި ޕްރޮޖެކްޓުގެ ދަށުން ސ. މަރަދޫ ހާބަރު އަދި ސ. ހުޅުމީދޫ ސެންޓްރަލް ހާބަރުގައި ދެ މެގަވޮޓް ސޯލަރ ޕީވީ ގާއިމް ކުރުމަށް ވަނީ ނިންމައިފަ އެވެ. އަދި ސ. ހިތަދޫ ޕޯޓް އޭރިއާގައި 8 މެގަވޮޓް ސޯލަރ ޕީވީ ގާއިމް ކުރުމަށްވެސް ވަނީ ނިންމައިފަ އެވެ.
މިނިސްޓްރީން ބުނި ގޮތުގައި އެ މަޝްރޫއުގެ މަސައްކަތް ކުރާނެ ކޮންޓްރެކްޓަރަކު ހޮވޭނެކަމަށް ބެލެވެނީ 2025 ވަނަ އަހަރުގެ ފުރަތަމަ ކުއާޓަރުތެރޭގަ އެވެ.
މި މަޝްރޫއު ނިމުމުން ސޯލާ ހަކަތައިން ކަރަންޓު އުފައްދަން ފެށުމުން އަހަރަކު 4.43 މިލިއަން ލީޓަރުގެ ތެޔޮ ބޭނުން ކުރުން މަދު ކުރެވޭނެ އެވެ. އޭގެ ސަބަބުން ތެލަށް ކުރާ ހަރަދުން އަހަރަކު 35.5 މިލިއަން ރުފިޔާ ސަލާމަތްކުރެވޭނެ ކަމަށް އެންވަޔަރަމަންޓް މިނިސްޓްރީން ބުންޏެވެ.
އެރައިސް މަޝްރޫއަކީ ރާއްޖޭގައި ބޭނުންކުރާ އިއާދަކުރަނިވި ހަކަތައިގެ ނިސްބަތް ބޮޑުތަނުން އިތުރުކޮށް އިއާދަކުރަނިވި ހަކަތައިން އުފައްދާ ކަރަންޓް ރާއްކާކުރެވޭނެ ބެޓަރީ އެނަރޖީ ސްޓޯރޭޖް ސިސްޓަމްތައް ގާއިމުކޮށް ރަށްރަށުގެ ކަރަންޓް ވިއުގަތައް ޒަމާނީ ފެންވަރަށް ތަރައްގީ ކުރުމަށް ބޭރުގެ އެހީއާއެކު މިނިސްޓްރީން ހިންގާ މަޝްރޫއެކެވެ.
މި މަޝްރޫއިން ރާއްޖޭގެ އެކި ރަށްރަށުގައި 36 މެގަވޮޓްގެ ސޯލާ ޕީވީ ގާއިމުކޮށް 40 މެވޮޓްގެ ބެޓަރީ އެނާޖީ ސްޓޯރޭޖް ސިސްޓަމްތައް ގާއިމުކުރުމަށް ވަނީ ހަމަޖެހިފަ އެވެ. އަދި ރާއްޖޭގެ 19 ރަށެއްގެ ކަރަންޓް ވިއުގަވެސް މި މަޝްރޫއުގެ ތެރެއިން އަޕްގްރޭޑްކޮށް ޒަމާނި ފެންވަރަށް ތަރައްގީ ކުރުމަށް ވަނީ ހަމަޖެހިފަ އެވެ.
