ހުޅުމާލެ ބަލަހައްޓަމުންދާ ކުންފުނި، އެޗްޑީސީން ބުނީ އެއީ އެ އަވަށުގެ ދެވަނަ ފިޔަވަހީގެ ވިނަރެސް ސަރަހައްދުގައިވާ ވަގުތީ ސައިޓެކެވެ.
އެ ތަނުގައި ސާފުތާހިރުކަން ކުޑަކޮށް ކާބޯތަކެތި ތައްޔާރު ކުރަމުންދާ ކަމުގެ ޝަކުވާ ލިބިގެން، އެ ސައިޓުގެ ކޮންޓްރެކްޓަރާ ވާހަކަ ދައްކައި އެ ކަން ހުއްޓުވާފައިވާ ކަމަށް އެ ކުންފުނިން ބުންޏެވެ. އަދި އެ ތަން ވެސް އެ ކުންފުނިން ސާފުކޮށްފައިވާ ކަމަށް ބުންޏެވެ.
ސޯޝަލް މީޑިއާގައި ކަންބޮޑުވުން ފާޅުކޮށް، ހިއްސާކޮށްފައިވާ މައުލޫމާތަކާ ގުޅިގެން ހުޅުމާލެއިން ތިން ބުރީގެ އިމާރާތެއް ބަލާ ފާސްކޮށް، 22 ބިދޭސީން މިދިޔަ ހޮނިހިރު ދުވަހުގެރޭ ވެސް ވަނީ އަތުލައިގެންފަ އެވެ. މިކަމާ ގުޅިގެން އިމިގްރޭޝަނުން ބުނީ އަތުލައިގެންފައި ވަނީ އެތަނުގައި ކާބޯތަކެތީގެ ވިޔަފާރި ކުރާ 22 ބިދޭސީން ކަމަށެވެ.
ރާއްޖޭގައި އުޅޭ ބިދޭސީންގެ މައުލޫމާތު އެއްކޮށް، ގާނޫނާ ހިލާފަށް އުޅޭ ބިދޭސީން ފޮނުވާލަން ސަރުކާރުން އަންނަނީ މަސައްކަތްތަކެއް ކުރަމުންނެވެ. ފާހަގަކޮށްލެވޭ ގޮތުގައި މި ގޮތަށް އަތުލައިގަންނަ ބިދޭސީންނަށް އިތުރު ފުރުސަތެއް ނުދޭނެ ކަމަށް އިމިގްރޭޝަނުން މީގެ ކުރިން ވަނީ ބުނެފަ އެވެ.
