މުޅި ރާއްޖެ ފެރީ ނިޒާމަކުން ގުޅާލުމަށް ފެށި ރާއްޖެ ޓްރާންސްޕޯޓް ލިންކް (އާރްޓީއެލް) ފެރީގެ ހިދުމަތް ނ. އަތޮޅުގައި އިފުތިތާހުކުރީ މިމަހުގެ 25 ވަނަ ދުވަހުއެވެ.
އަންނަ މަހުގެ އެއްވަނަ ދުވަހާއި ހަމައަށް ފެރީ ދަތުރުތައް ކުރުމަށް ހަމަޖެހިފައިވަނީ ހިލެއެވެ. ހިލޭ ދަތުރުތައް ކުރުމުގެ ބޭނުމަކީ ޝެޑިއުލް ދަތުރުތަކަށް ރައްޔިތުން ހޭލުންތެރިކުރުވުންކަމަށް އެމްޓީސީސީން ބުނެއެވެ.
ޓްރާންސްޕޯޓް މިނިސްޓްރީން ވަނީ ނ. އަތޮޅު އާރުޓީއެލްގެ ފެރީގެ އަގުތައް މިއަދު އާއްމުކޮށްފައެވެ. ނ. އަތޮޅުގެ އަގުތަކަށް ބަލާއިރު އެންމެ މަތިންވެސް ފެރީ ދަތުރަކަށް ދައްކަންޖެހެނީ 180 ރުފިޔާއެވެ.
މި ހިދުމަތާއި އެކު އެ އަތޮޅުގައި މީހުން ދިރިއުޅޭ 13 ރަށް ގުޅާލާނެއެވެ. ނ. އަތޮޅުގައި ފެރީގެ ހިދުމަތް ބޭނުންކުރަނީ އެކަމަށް ހާއްސަކޮށް ބަނދެފައިވާ ދެ އުޅަނދު ބޭނުން ކޮށްގެންނެވެ.
ނ. އަތޮޅުގައި މި ހިދުމަތް ހަފްތާގެ 7 ދުވަހު ލިބޭނެކަމަށްް އެމްޓީސީސީން ބުނެއެވެ. އަދި ދަތުރު ކުރާނީ 3 ރޫޓަކުންކަމަށްވެސް އެ ކުންފުނިން ބުނެއެވެ.
ޖީބަށް ލުއި ފެރީ ނިޒާމަކުން މުޅި ރާއްޖެ ގުޅާލުމަށް އާރުޓީއެލްގެ ހިދުމަތް ފެށީ މިދިޔަ ސަރުކާރުންނެވެ. ނ އަތޮޅުގައި މި ހިދުމަތް ފެށުމުން 9 އަތޮޅުގައި މި ހިދުމަތް މިހާރު ލިބޭނެއެވެ. އެ އަތޮޅުތަކަކީ ހއ، ހދ، ށ، ނ، ޅ،ގއ، ގދ އަދި އައްޑޫ ސިޓީއާއި ފުވައްމުލަކު ސިޓީއެވެ.
އެމްޓީސީސީން ބުނީ ބާކީ އޮތް 11 އަތޮޅުގައި މި ހިދުމަތް ފެށުމަށްް ވާންޖެހޭ ތައްޔާރީތައް ވަމުން އަންނަކަމަށެވެ
