އިންޑީއާގެ ނޫސްތަކުން ބުނި ޖައިޝަންކަރު ރާއްޖެއަށް ވަޑައިގަންނަވަނީ އަންނަމަހުގެ 9 އެއް ހިސާބުގައިކަމަށެވެ. އަދި 3 ދުވަހަށްް ކުރައްވާ މި ރަސްމީ ދަތުރުގައި ރަައީސް ޑރ. މުހައްމަދު މުއިއްޒާއި ފޮރިން މިނިސްޓަރު މޫސާ ޒަމީރާއި ބައްދަލުކުރެއްވުމަށް ހަމަޖެހިފައިވާކަމަށްް އިންޑިއާ ނޫސްތަކުން ބުނެއެވެ.
މީ ރައީސް ޑރ. މުއިއްޒުގެ ވެރިކަން ފެށުނު ފަހުން އިންޑީއާގެ އޮފިޝަލަކު ރާއްޖެއަށްް ކުރައްވާ ފުރަތަމަ ރަސްމީ ދަތުރުފުޅެވެ.
އިންޑިއާގެ ފޮރިން މިނިސްޓަރު ޑރ. އެސް.ޖައިޝަންކަރު އެންމެ ފަހުން ރާއްޖެ ވަޑައިގަތީ މިދިޔަ އަހަރުގެ ޖެނުއަރީ މަހުގެ 18 ވަނަދުވަހުއެވެ. އެ ފަހަރުގެ ޖައިޝަންކަރު ރާއްޖެ ވަޑައިގަތީ ހދ. ހަނިމާދޫ އިންޓަނޭޝަނަލް އެއާޕޯޓު ތަރައްގީ ކުރުމުގެ މަޝްރޫއުގެ ބިންގާ އެޅުމުގެ ރަސްމިޔާތުގައި ބައިވެރިވެވަޑައިގަތުމަށެވެ.
އިންޑިއާގެ އިސް އޮފިޝަލަކު ރާއްޖެއަށް މި ވަޑައިގަންނަވަނީ މިއަހަރު އިންޑިއާއިން ރާއްޖެއަށް ދޭ ހިލޭ އެހީގެ އަދަދު މުރާޖާކޮށް އެ އަދަދު ކުޑަކުރަން ބަޖެޓްގައި ހިމަނާފައިވަނިކޮށެވެ.
އިތިރަށް ކިޔާލުމަށް : ރާއްޖެއަށް ދޭ އެހީ ކުޑަކުރަން އިންޑިއާ ބަޖެޓްގައި ހިމަނައިފި
ރައީސް މުއިއްޒުގެ ސަރުކާރާ ހަވާލުވުމަށްފަހު، ރާއްޖެއާ އިންޑިއާއާ ދެމެދު އޮތް ގުޅުތަކަށް ބުރޫ އަރާފައެވެ. ރާއްޖޭގެ ތިން ނައިބު ވަޒީރަކު މޯދީއަށް ސޯޝަލް މީޑިއާގައި މަލާމަތް ކުރުމާއި ރައީސް މުއިއްޒުގެ ނުސީދާ ބަހުގެ ހަމަލާތަކަކަށްފަހު ދެ ގައުމުގެ ހާރިޖީ ގުޅުން ގޯސްވިއެވެ.
ނަމަވެސް، އޭގެ ފަހުން ރާއްޖޭގައި ތިބި އިންޑިއާ ސިފައިން ފޮނުވާލާ އެ ގައުމުން ބޭނުންވި ގޮތަށް މަދަނީން ގެނެސް، ހާރިޖީ ވަޒީރު މޫސާ ޒަމީރު އިންޑިއާއަށް ކުރެއްވި ދަތުރާއެކު ދެ ގައުމުގެ ގުޅުންވަނީ ކުރިއަށްވުރެ ރަނގަޅުވާން ފަށާފަެއެވެ.
