އޮޑިޓަރ ޖެނެރަލް އާދިއްތަ ދުވަހު ނެރުއްވި، 2022 ވަނަ އަހަރުގެ މީރާގެ އޮޑިޓް ރިޕޯޓުގައި ފާހަގަ ކުރައްވާފައިވާ ގޮތުގައި އެ އަހަރުގެ ނިޔަލަށް ދައުލަތަށް ލިބެން ޖެހޭ ފައިސާގެ 64 އިންސައްތައަކީ ޓޫރިޒަމްގެ ބޭނުމަށް ދޫކޮށްފައިވާ ރަށްތަކުގެ ކުއްޔާއި ރަށްރަށުގެ ކުލި ނުދައްކައިގެން އަރާފައިވާ ޖޫރިމަނާއެވެ.
ޓޫރިސްޓް ރިސޯޓްތަކުގެ ކުލީގެ ގޮތުގައި އަދި ކުލި ނުދައްކައިގެން އަރާފައިވާ ޖޫރިމަނާގެ އަދަދުވަނީ އެ އަހަރުގެ ނިޔަލަށް، ނުވަ ބިލިއަން ރުފިޔާއަށް އަރާފައެވެ. އޭގެ ތެރެއިން 6.4 ބިލިއަން ރުފިޔާއަކީ ޖޫރިމަނާ އަދި އިންޓްރެސްޓްގެ ގޮތުގައި ދައުލަތަށް ލިބެން ޖެހޭ ފައިސާކަން އޮޑިޓް ރިޕޯޓުގައި ފާހަގަކޮށްފައި ވެ އެވެ.
ދައުލަތަށް ލިބެން ޖެހޭ ނުވަ ބިލިއަން ރުފިޔާ ނުލިބިވާ މައިގަނޑު ސަބަބުތައްވެސް އޮޑިޓް ރިޕޯޓުގައި ފާހަގަކޮށްފައި ވެ އެވެ. އެ ރިޕޯޓުގައި ބުނެފައިވާ ގޮތުން އެ ފައިސާ ނުލިބިވާ މައިގަނޑު ސަބަބުތަކުގެ ތެރޭގައި ކުލީގެ އެއްބަސްވުމާ އެއްގޮތަށް ރަށްތައް ތަރައްގީ ނުކުރެވުމާއި، އިތުރަށް ތަރައްގީ ކުރުމަށް ދެވޭ މުއްދަތުގައިވެސް ރަށް ތަރައްގީ ނުކުރެވި، ކުލި ނުދައްކައި އަހަރުތަކެއް ފާއިތުވަމުން ދިޔުމާއި، އެއްބަސްވުންތައް ބައެއް ފަހަރު ބާތިލުކޮށްފައިވަނީ ރަނގަޅަށް ނޫން ކަމަށްވުން ހިމެނެ އެވެ. އަދި ޝަރުއީ މަރުހަލާއިން ނިންމާފައިވާ ނިންމުންތައް ޓޫރިޒަމް މިނިސްޓްރީން މީރާއާއެކު ހިއްސާކޮށްފައި ނުވުންވެސް ހިމެނެ އެވެ. އަދި މީރާއިން ދައުވާ ކުރާ މައްސަލަތަކުގައި މީރާއާ އެއްކޮޅަށް ނިމޭ ހާލަތްތަކުގައިވެސް ހުކުމާ އެއް ގޮތަށް ފައިސާ ދައްކާފައި ނުވާކަން އޮޑިޓް ރިޕޯޓުގައި ފާހަގަކޮށްފައި ވެ އެވެ.
ދައުލަތަށް ލިބެން ޖެހޭ ފައިސާ ހޯދުމަށް މީރާއިން ގިނަ މަސައްކަތްތަކެއް ކުރަމުންދާކަންވެސް އޮޑިޓް ރިޕޯޓުގައި ފާހަގަކޮށްފައި ވެ އެވެ. އަދި، ދައުލަތަށް ލިބެން ޖެހޭ ފައިސާ ހޯދުމަށް، އަޅަން ޖެހޭ އެންމެހައި އެންފޯސްމެންޓް ފިޔަވަޅުތައް އަޅަމުން ގެންދިޔުމުގެ އިތުރުން ފައިސާ ނުދައްކާ ފަރާތްތަކާމެދު އަޅާ ފިޔަވަޅުތައް އިތުރަށް ހަރުދަނާ ކުރުމަށް އޮޑިޓް ރިޕޯޓުގައި އޮޑިޓަރ ޖެނެރަލްވަނީ ލަފާ ދެއްވާފަ އެވެ.
