މަޝްހޫރު އެކްޓަރު ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކޮށްފައިވާ "ސާޔާ" ގެ ޓިކެޓް ބާރު ސްޕީޓުގައި އޮލިމްޕަހުގައި އަންނަނީ ވިކެމުން ނެވެ. ސާޔާގެ ކާސްޓްގައި އައިމިނަތު ރަޝްފާ (އާޝާ) އާއި އިބްރާހީމް ޖިހާދު (ޖިމީ) ވެސް ހިމެނެ އެވެ. މީގެ އިތުރުން މުހައްމަދު މަނިކާއި އަހްމަދު ނިމާލް ވެސް ފެނިގެންދާނެ އެވެ.
ފިލްމުގެ މުހިންމު ރޯލަކުން ވެސް ޔޫއްޕެ ފެނިގެންދާނެ އެވެ.
ފިލްމުގެ ސްކްރީންޕްލޭ ލިޔެ އެޑިޓިންގެ މަސައްކަތް ކޮށްފައި ވަނީ ވެސް ޔޫއްޕެ އެވެ. ކެމެރާކުރީ ޝިމާޒް އަބްދުﷲ (މާސްކޭ) އެވެ. ބެކްމިއުޒިކު ހަދާފައިވަނީ އައްޔުމަން ޝަރީފު އެވެ.
ޕްރޮޑިއުސަރު އިސްމާއީލް ޝަފީގުގެ "ޝައި" ޕްރޮޑަކްޝަން އިން އަލަށް ގެނެސްދޭ "ސާޔާ" އަކީ މި އަހަރު އޮލިމްޕަހަށް އަންނަ ދެވަނަ ބިރުވެރި ފިލްމެވެ. މި އަހަރު އެޅުވި ފުރަތަމަ ބިރުވެރި ފިލްމަކީ އައި ފިލްމްސް އިން ފެބްރުއަރީގައި ގެނެސްދިން "ކަންބަޅި" އެވެ.
"ސާޔާ" އަކީ މި އަހަރު އޮލިމްޕަހުގައި އަޅުވާ ހަ ވަނަ ފިލްމެވެ.
