ބަތަލާ ހީނާ އިންސްޓަގްރާމްގައި ކޮށްފައިވާ ޕޯސްޓެއްގައި ބުނެފައިވަނީ ކެންސަރު ބައްޔަށް ދޭ ކީމޯތެރަޕީގެ ސަބަބުން ބޮލަށް އަތްލާ ކޮންމެ ފަހަރަކު ގިނަ އަދަދަކަށް އިސްތަށި ފައިބާކަން ފާހަގަވާ ކަމަށާއި އެހެންވެ އެކަމާ ހިތްދަތިވެގެން އުޅުމުގެ ބަދަލުގައި، މި ދަނޑިވަޅުގައި ބޭނުން ވަނީ ފަރުވާގެ ތެރޭގައި ދިމާވާ ހުރިހާ ކަމަކާ ވަރަށް ހިތްވަރާ އެކީ ކުރިމަތިލާން ކަމަށެވެ.
ހިންދީ ޓީވީ ސިލްސިލާތަކުން މަޝްހޫރުކަން ހޯދި އަށް އުރަމަތީ ކެންސަރު ޖެހިގެން ފަރުވާ ހޯދަން ފެށި ކަމަށް އޭނާ ބުނީ މިދިޔަ ޖޫން މަހު އެވެ އޭނަ ބުނީ ބައްޔާ ހަނގުރާމަ ކުރަން ބޭނުން ވަނީ ވަރަށް އީޖާބީކޮށް ކަމަށެވެ. އަދި މިފަދަ ހާލަތެއްގެ ޝިކާއަރައަކަށްވެފައިވާ އެހެން މީހުންނަށް ހިތްވަރު ދެވޭ އަދި ނަމޫނާއަކަށް ވާން ބޭނުންވާ ކަމަށް ވެސް ހީނާ ބުންޏެވެ.
ހީނާ އެންމެ ބޮޑަށް މަޝްހޫރުވީ ސްޓާ ޕްލަސްގެ ޑްރާމާ ސިލްސިލާ "ޔޭ ރިޝްތާ ކިޔާ ކެހެލާތާ ހޭ"ގެ "އަކްޝަރާ"ގެ ރޯލުންނެވެ. އަދި ޓިވީ ސިލްސިލާ "ކަސައުޓީ ޒިންދަގީ ކީ 2"ގެ "ކޮމަލިކާ"ގެ ރޯލު ވެސް އޭނާ ކުޅުނެވެ.
މީގެ އިތުރުން ހީނާ ވަނީ މަޝްހޫރު ހިންދީ ރިއަލިޓީ ޝޯތައް ކަމަށްވާ "ކަތުރޯ ކޭ ކިލާޑީ"ގެ އަށް ވަނަ ސީޒަން އާއި "ބިގް ބޮސް"ގެ 11 ވަނަ ސީޒަންގައި ބައިވެރިވެފަ އެވެ.
ހީނާ ކުޅުނު ބޮލީވުޑް ފިލްމުތަކުގެ ތެރޭގައި "ހެކްޑް"، "ސްމާޓްފޯން"، "ލައިންސް"، "ވިޝްލިސްޓް" އަދި "އަންލޮކް" ކަހަލަ މަދު ފިލްމުތައް ހިމެނެ އެވެ. އަދި ވެބް ސީރީޒެއް ކަމަށްވާ "ޑެމޭޖްޑް 2"ގެ ދެވަނަ ސީޒަންގެ ރޯލެއް ވެސް އޭނާ ކުޅުނެވެ.
