އެމްޕީއެލުން ނެރުނު އިއުލާނެއްގައި ބުނެފައިވަނީ، މާލޭ އިންޑަސްޓްރިއަލް ޒޯނުގައި ހެވީ ވެހިކަލްތަކަށް ހާއްސަ ޕާކިންގ ޒޯނެއް ހަދަން ނިންމާފައިވާ ކަމަށާއި، އެތަނުން ޕާކިންގ ޖާގަ ކުއްޔަށް ދޫކުރަން ނިންމާފައިވާ ކަމަށެވެ.
މާލެ އިންޑަސްޓްރިއަލް ވިލެޖް ސަރަހައްދުގައި ގިނަ ފަރާތްތަކުން، ޕާކްކުރުމަށް ސްލޮޓަށް އެދެމުންދާތީ، އެސަރަހައްދުގައި ވެހިކަލް ޕާކްކުރެވޭނެ އިންތިޒާމް ހަމަޖެއްސުމަށް، ނިންމާފައިވާ ކަމަށް އިއުލާނުގައި ބުނެފައިވެ އެވެ.
އެ އިއުލާނުގައިވާ ގޮތުން އޮގަސްޓް 15 ވަނަ ދުވަހުން ފެށިގެން މި ސަރަހައްދުން ޕާކް ކުރުމަށް ސްލޮޓްތައް ކުއްޔަށް ދިނުމަށް ވަނީ ނިންމާފައިވާ ކަމަށާއި، އަދި ކުއްޔަށް ދިނުމަށް ހަމަޖެހިފައިވަނީ ސްލޮޓްތަކުގެ އަދަދުން، ފުރަތަމަ އެދޭ ފަރާތަކަށް ފުރަތަމަ ދިނުމުގެ އުސޫލުން ކަމަށެވެ.
ކުއްޔަށްދޫކުރުމަށް ހަމަޖެހިފައިވަނީ :
- ކޮމާޝަލް ހާބަރުގައި ރަޖިސްޓްރީ ކޮށްފައިވާ ޕިކަޕް/ލޮރީ - 2،000 ރުފިޔާ
- ބައުޒަރު - 4،000 ރުފިޔާ
- ކްރޭން - 6،000 ރުފިޔާ
- އެހެނިހެން އުޅަނދުތައް - 4،000 ރުފިޔާ
އެމްޕީއެލުން ވަނީ، މި ސަރަޙައްދުން ވެހިކަލް ޕާކްކުރުމަށް ސްލޮޓް ކުއްޔަށްނެގުމަށް ޝައުގުވެރިވާ ފަރާތްތަކުން، ލިއުމަކުން ހުށަހެޅުމަށް އެދިފަ އެވެ. އަދި ލިއުމާއިއެކު ވެހިކަލްގެ ރެޖިސްޓަރީ، އިންޝުރެންސް، ރޯޑްވާދިނަސް، ތެޔޮ ނުވަތަ ގޭސް އުފުލާ އުޅަނދެއް ކަމުގައި ވާނަމަ ޑިފެންސް މިނިސްޓްރީ / އެމްއެންޑީއެފް އިން ދީފައިވާ ލިޔުން އަދި ވެރިފަރާތް / އޮޕަރޭޓް ކުރާ ފަރާތުގެ އައިޑީ ކާޑު ނުވަތަ ކުންފުނީގެ ރަޖިސްޓްރީ ކޮޕީ ހުށަހަޅަން ޖެހޭނެ އެވެ.
