ވިނަރެސް ޓަވަރުގައި އެކްސެސް ކޮންޓްރޯލް ސިސްޓަމް ހަރުކޮށް ބޭނުންކުރަން ފެށީ މިދިޔަ ޖޫންމަހުގެ 23 ވަނަދުވަހުއެވެ. އެހެންނަމަވެސް ހަފްތާއެއްވެސް ނުވަނީސް ބަޔަކު ވަނީ ދޮރުތަކަށްް ގަސްތުގައި ގެއްލުން ދީ ހަލާކުކޮށްލާފައެވެ. އެކަމާއި ގުޅިގެން އެކްސް ކޮންޓްރޯލް ސިސްޓަމްގެ ހިދުމަތް ވަގުތީ ގޮތުން އެޗްޑީސީން މެދުކަނޑާލިއެވެ.
އެޗްޑީސީން ބުނީ އެކްސެސް ކޮންޓްރޯލް ސިސްޓަމް ރަނގަޅުކޮށް މިމަހުގެ 11 ވަނަދުވަހުގެ ފެށިގެން އަލުން ބޭނުން ކުރަން ފަށާނެކަމަށެވެ. އަދި ދޮރުތަކުގެ ޓެގް ނުނަގާ ފަރާތްތަކުން ވީ އެންމެ އަވަހަކަށް ވިނަރެސް 10ގެ މެނޭޖްމަންޓް އޮފީހުން ޓެގްތަކާއި ހަވާލުވުމަށްވެސް އެޗްޑީސީން އިލްތިމާސްކުރެއެވެ.
އެކްސެސް ކޮންޓްރޯލް ސިސްޓަމަކީ ޓަވަރުތަކުގައި އުޅޭ ރައްޔިތުންގެ ސަލާމަތާއި ރައްކާތެރިކަމަށް ބެހެއްޓިފައިވާ ތަކެއްޗަށް ވާތީ އެތަކެއްޗަށް ގެއްލުން ދޭ ފަރާތްތަކަށް ފިޔަވަޅު އަޅާނެކަމުގެ އިންޒާރުވެސް އެޗްޑީސީން ވަނީ ދީފައެވެ.
