އެ ކުންފުނިން މިއަދު ވަނީ އިހަވަންދިއްޕޮޅުގައި ފަށާ ބަންކަރިން ހިދުމަތަށް ހއ. އުލިގަމުގައި ގާއިމް ކުރަން ނިންމާފައިވާ ޕޯޓަށް ހަ މީހުން ހޯދަން އިއުލާންކޮށްފައެވެ. އެއީ އެސިސްޓަންޓް އެޑްމިނިސްޓްރޭޓިވް އެސޯސިއޭޓަކައި ލޭބަރެއްގެ އިތުރުން ހަތަރު ސެކިއުރިޓީ އެސިސްޓެންޓުންނެވެ.
މި މަގާމުތަކަށް ޝައުގިވެރިވާ ފަރާތްތަކުން މިމަހުގެ 15 ވަނަދުވަހުގެ 15:30 ގެ ކުރިން ހުށައެޅުމަށް އެމްޕީއެލުން ވަނީ ހުޅުވާލާފައެވެ. އެ ކުންފުނިން ބުނީ ވަޒީފާއަށް އެދޭ ފާރާތްތަކުން ހުށައަޅާނީ އެމް.ޕީ.އެލްގެ އޮންލައިން ޖޮބް އެޕްލިކޭޝަން ޕޯޓަލް މެދުވެރިކޮށްކަމަށެވެ.
މި މަޤާމަށް މީހަކު ހޮވުމަށް ބޭއްވޭ އިންޓަވިއު އޮންނާނީ މިމަހުގެ 22 އާއި ސެޕްޓެމްބަރ 05 އާއި ދެމެދުގައިކަމަށްވެސް އެމްޕީއެލުން ބުނެއެވެ.
އިހަވަންދިއްޕޮޅުގައި ބައިނަލް އަގްވާމީ ބަންކަރިން މަޝްރޫއު މިމަހުގެ 20 ވަނަ ދުވަހު ފަށާނެކަމަށް އިގްތިސާދާއި ބެހޭ ވަޒީރު މުހައްމަދު ސައީދު ވަނީ ވިދާޅުވެފައެވެ. އިހަވަންދިއްޕޮޅުގައި ބައިނަލް އަގްވާމީ ބަންކަރިން މަޝްރޫއެއް ހިންގަން އެސްޓީއޯއިން ހަކަތައިގެ ވިޔަފާރިކުރާ ދުނިޔޭގެ އެންމެ ބޮޑު އަމިއްލަ ކުންފުނި، ވިޓޯލްއާ އެކު ޓާމް ޝީޓެއްގައި ސޮއިކުރީ މިއަހަރުގެ މާރިޗު މަހުގެ ތެރޭގައެވެ.
