ނަޝީދު މިހެން ވިދާޅުވީ މި ސަރުކާރުގައި ތިއްބެވި ބޭފުޅުން މީގެކުރިން އިންޑިއާއާ ގުޅޭގޮތުން ދައްކާފައިވާ ވާހަކަތަކުގެ ހަނދާން އެމްޑީޕީގެ އިސް ބޭފުޅުން އާކުރަމުންދާ ދަނޑިވަޅެއްގަ އެވެ. މި ވާހަކަތަކުގެ ހަނދާންތައް އެމްޑީޕީގެ އިސް ބޭފުޅުން އާކުރަން ފަށާފައިވަނީ އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރު މިހާރު ރާއްޖެއަށް ކުރައްވާ ދަތުރުފުޅާއި ދިމާކޮށެވެ.
ކުރީގެ ފޮރިން މިނިސްޓަރު އަބްދުﷲ ޝާހިދުގެ އެ ވާހަކަތައް ހިއްސާކުރައްވައި ނަޝީދު "އެކްސް"ގައި ކުރެއްވި ޕޯސްޓެއްގައިވިދާޅުވީ މިހާރުގެ ސަރުކާރުން އިންޑިއާއާއެކު ގުޅުން ބަދަހިކުރުމުގެ ސިޔާސަތު އިސްކުރުމުން، ކުރިން ކަންވެފައި އޮތް ގޮތް ފާހަގަކޮށް މަލާމަތްކުރުމަކީ ދެ ގައުމުގެ ގުޅުން ބަދަހިވާން އެދޭ ބަޔަކު ނުކުރާނެ ކަމެއްގެ ގޮތުގައި ސިފަކުރައްވައިފައެވެ.
އަދި އެ ކަމަށް މަރުހަބާ ނުކިޔާ ފާޑުކިޔުންތައް އަމާޒުކުރުމުން ދޭހަވަނީ އިންޑިއާއާއި ރާއްޖެ ގުޅުމަށް ނޭދޭކަން ކަމަށާއި އެއީ ސިޔާސީ ގޮތުން "ޕޮއިންޓު ހޯދުން" ކަމުގައި ވެސް ނަޝީދު ސިފަކުރެއްވި އެވެ. އަދި އެކަމުން ދޭހަވަނީ އުސޫލުގައި ނުހިފެހެއްޓޭކަން ކަމަށް ވެސް ވިދާޅުވި އެވެ.
ނަޝީދުގެ ވެރިކަމާއި މިދިޔަ އެމްޑީޕީގެ ސަރުކާރުގައި ވެސް ވަނީ އިންޑިއާ އާއެކު ގާތް ގުޅުމެއް ބާއްވައިފަ އެވެ. އޭރު ޕީޕީއެމް/ ޕީއެންސީ އިދިކޮޅުގައި އޮވެ ވަނީ އިންޑިއާ ސިފައިން ރާއްޖޭގައި ތިބޭ މައްސަލާގައި، "އިންޑިއާ އައުޓް" ގެ ނަމުގައި ހަރަކާތްތަކެއް ހިންގައިފަ އެވެ.
ރާއްޖެ އާއި އިންޑިއާގެ ގުޅުން މި ސަރުކާރުގެ އެންމެ ކުރީކޮޅު ގޯސްވީ ރާއްޖޭގައި ތިބި އިންޑިއާގެ ސިފައިން ފޮނުވާލަން ރައީސް މުއިއްޒުގެ ސިޔާސަތަކަށް ވެފައިވާއިރު، އެ އަށް އަމަލީ ސިފަ ގެންނަން ނިންމެވުމުންނެވެ. އެކަމަކު، އިންޑިއާ އިން ވެސް ފަހުން އެއްބާރުލުން ދީ، އެ ގައުމުން ހަދިޔާ ކޮށްފައިވާ ދެ ހެލިކޮޕްޓަރާއި ޑޯނިއާ ދުއްވަން ގެނެސްފައި ތިބި ސިފައިން ގެންދިޔަ އެވެ.
އޭގެ ފަހުން ދެ ގައުމުން އެއްބަސްވި ގޮތަށް އިންޑިއާ އިން މަދަނީ މީހުން ގެނެސް އެ އުޅަނދުތައް ވަނީ އޮޕަރޭޓް ކުރަން ފަށައިފަ އެވެ. އަދި ސަރުކާރުގެ ފޮރިން މިނިސްޓަރު މޫސާ ޒަމީރު އިންޑިއާއަށް ކުރެއްވި ރަސްމީ ދަތުރުފުޅަށްފަހު ގުޅުންތައް އަންނަނީ އިތުރަށް ރަނގަޅުވަމުންނެވެ.
އެގޮތުން ކުރީ ސަރުކާރުން އިންޑިއާ މެދުވެރިކޮށް ނެގި 50 މިލިއަން ޑޮލަރުގެ ލޯނެއް ދެއްކުން ދާދިފަހުން އިންޑިއާ އިން ފަސްކޮށްދީފައިވާއިރު، މޯދީ ތިންވަނަ ދައުރަކަށް ބޮޑުވަޒީރު ކަމުގެ ހުވާ ކުރެއްވި ރަސްމިއްޔާތަށް ރައީސް މުއިއްޒު އިންޑިއާ އަށް ވެސް ވަޑައިގެންނެވި އެވެ.
އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމަނިއަމް ޖައިޝަންކަރު މިހާރު އުޅުއްވަނީ ތިން ދުވަހުގެ ރަސްމީ ދަތުރެއްގައި ރާއްޖޭގަ އެވެ. އޭނާ މިއަދު ރައީސް ޑރ. މުހައްމަދު މުއިއްޒާ ވެސް ބައްދަލުކުރައްވައިިފަ އެވެ. ދެ ބޭފުޅުން ވަނީ ދެ ގައުމުގެ ގުޅުން އާ އުސްމިންތަކަކަށް ގެންދެވޭނެ ކަމުގެ ޔަގީންކަން ދެއްވައި ގުޅުން ވަރުގަދަ ކަމުގެ މެސެޖުތައް ދެއްވައިފަ އެވެ. ރާއްޖެ އާއި އިންޑިއާގެ ގުޅުން ވަރުގަދަ ކަމުގެ ޔަގީންކަން ވެސް ރައީސް މުއިއްޒު ދެއްވި އެވެ.
