އިންޑިއާގެ އެކްސްޓާނަލް އެފެއާޒް މިނިސްޓަރު، ޑރ. ސުބްރަމާނިއަމް ޖައިޝަންކަރު ރަސްމީ ދަތުރުފުޅެއްގައި ރާއްޖެ ވަޑައިގެން އުޅުއްވާއިރު، އެމްޑީޕީގެ ރައީސް އަބްދުﷲ ޝާހިދުވަނީ މިއަދު ޖައިޝަންކަރާއި ބައްދަލު ކުރައްވާފައެވެ.
މިއީ މިފަދަ ރަސްމީ ދަތުރުފުޅެެއްގައި ރާއްޖޭގެ އިދިކޮޅު ޕާޓީގެ އިސްވެރިއަކާ އިންޑިއާ ސަރުކާރުގެ އިސްވެރިއަކު ބައްދަލުކުރި ފުރަތަމަ ފަހަރެވެ. އެ ބައްދަލުވުމާ ގުޅުވައި އެމްޑީޕީން މިރޭ ވަނީ ބަޔާނެއް ނެރެފަ އެވެ.
އެމްޑީޕީން ނެރުނު ބަޔާނު ބުނީ ރާއްޖެއާއި އިންޑިއާގެ ގުޅުން އަބަދުވެސް ބިނާވެފައިވަނީ އެއް ގައުމުން އަނެއް ގައުމަށް އިހުތިރާމްކުރުމާއި، ބައިނަލްއަގުވާމީ ގާނޫނުތަކަށް ހުރުމަތްތެރިކޮށް ހިތުމާއި، ދެގައުމުގެ ސަރަޙައްދުގެ ސަލާމަތްތެރިކަމާއި، އަދި ސަރަޙައްދީ ސަލާމަތާއި، އިންޑިއާ ކަނޑުގެ ސަރަޙައްދުގެ އަމާންކަމާއި ރައްކާތެރިކަމަށް ކުރެވޭ މަސައްކަތްތަކުގެ މައްޗަށް ކަމަށެވެ. އަދި ރާއްޖެއިން "ބައިނަލްއަގުވާމީ 911 އަށް ގުޅައިފި" ކޮންމެ ވަގުތެއްގައިވެސް އެންމެ ފުރަތަމަ އިޖާބަދޭނީ އިންޑިއާކަމުގެ ޔަގީންކަން ރާއްޖެ އަށް އަބަދުވެސް އޮންނަ ކަމަށް އެމްޑީޕީން ބުނެފައިވެ އެވެ.
ނަމަވެސް މިއަދުގެ ސަރުކާރުން އެކި ގޮތްގޮތަށް އިންޑިއާއާ ދެކޮޅަށް ދިވެހި ރައްޔިތުންގެ މެދުގައި ނަފްރަތު އުފެއްދުމަށް މަސައްކަތްކުރިކަމީ ހިތާމަހުރި ކަމެއް ކަމަށާއި އެކި ބަސްތަކާއި މަލާމާތުގެ ޒަރީއާއިން، ގިނަ ދުވަސްވީ ރަޙްމަތްތެރިއެއް އަދި ތަރައްގީގެ ބައިވެރިއެއް ކަމަށްވާ އިންޑިއާ، ގަނާކުރާ ގައުމެއްގެ ގޮތުގައި ސިފަކުރުމުގެ ސަބަބުން އެކަމުގެ ނޭދެވޭ އަސަރުތައް ރާއްޖޭގެ އިގުތިސޯދަށްކޮށް، ބައިނަލްއަގުވާމީ މުޖްތަމަޢުގައި ރާއްޖެއަށް ލިބިފައި އޮތް މަގާމަށް އަސަރުކޮށްފައިވާ ކަމަށް އެމްޑީޕީން ބުންޏެވެ.
އެމްޑީޕީން ވަނީ "އިންޑިއާ އައުޓް" ގެ ނަމުގައި ހިންގި ހަރަކާތްތަކުގެ ސަބަބުން ލިބުނު ގެއްލުމަށް ސަރުކާރުން މާފަށް އެދުމަށް ވެސް ގޮވާލައިފަ އެެވެ.
ޔާމީން އިސްވެ ހިންގެވި އިންޑިއާ އައުޓް ހަރަކާތެއްގެ ތެރެއިން ޔާމީން އަރުހުގައި މިހާރު ރައްޔިތުންގެ މަޖިލީހުގެ ރައީސް އަބްދުއްރަހީމް
ފާއިތުވި ފަސް އަހަރު އިންޑިއާ އިން ރާއްޖެއަށް ގިނަ އެހީތަކެއް ފޯރުކޮށްދީފައިވާ ކަމަށާއި އޭގެ ތެރެއިން ބައެއް އެއްބަސްވުންތައް ދަންމާލައި އިތުރަށް އެހީތެރިކަން ފޯރުކޮށްދޭން އެ ގައުމުން ނިންމި ނިންމުމަށް ވެސް އެމްޑީޕީން ޝުކުރު އަދާކުރި އެވެ.
ޝާހިދާއި ޖައިޝަންކަރުގެ މި ބައްދަލުކުރެއްވުމުގައި ޝާހިދުގެ އަރިހުގައި އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުޙައްމަދު ނާޒިލްއާއި، ޕާޓީގެ ނައިބު ރައީސާ ހިސާން ހުސެއިންގެ އިތުރުން، އެ ޕާޓީގެ އިސް ބޭފުޅުން ބައިވެރިވެ ވަޑައިގަތެވެ.
ޖައިޝަންކަރު އިއްޔެ ރާއްޖެ ވަޑައިގަތީ ފޮރިން މިނިސްޓަރު މޫސާ ޒަމީރުގެ ދައުވަތަކަށެވެ. އޭނާ މިއަދު ވަނީ ރައީސް މުއިއްޒުގެ އަރިހަށް އިހުތިރާމްގެ ޒިޔާރަތެއް ކުރައްވައިފަ އެވެ. އެ ބައްދަލުވުމާއި ބައްދަލުވުމަށް ފަހު ވެސް ދެ ބޭފުޅުން ދެ ގައުމުގެ ގުޅުމުގެ ވަރުގަދަކަން ދައްކައިދޭ ވާހަކަފުޅުތައް ދައްކަވައިފަ އެވެ.
