ސަރުކާރުން އިންޑިއާ-ރާއްޖެ ގުޅުން ރަނގަޅު ކުރުމުގެ މަސައްކަތް ކުރަމުން އަންނައިރު، ޖައިޝަންކަރު ވަނީ އިއްޔެ ރާއްޖެ ވަޑައިގެންފަ އެވެ.
އެކްސްގައި ޖައިޝަންކަރު ރައީސް މުއިއްޒަށް ޝުކުރު އަދާކުރެއްވީ އެ މަނިކުފާނު ކުރެއްވި ޕޯސްޓެއް، ރިޕޯސްޓް ކުރައްވަ އެވެ.
ރާއްޖޭގެ ފޮރިން މިނިސްޓަރު މޫސާ ޒަމީރުގެ ދައުވަތަކަށް ރާއްޖެ އަށް ކުރައްވަމުން ގެންދަވާ ތިން ދުވަހުގެ ރަސްމީ ދަތުރުގައި އުޅުއްވަމުން ޖައިޝަންކަރު ވަނީ ދެ ގައުމުގެ ގުޅުން އިތުރަށް ބަދަހިކުރުމުގައި ދެމިހުންނަވާނެ ކަމަށް ވިދާޅުވެފަ އެވެ.
އިންޑިއާގެ އެކްސްޓާނަލް އެފެއާޒް މިނިސްޓަރު އެސް. ޖައިޝަންކަރު ރަސްމީ ދަތުރެއްގައި އިއްޔެ ރާއްޖެ ވަޑައިގަތުމުން މަރުހަބާ ކިޔަނީ - ފޮޓޯ/ފޮރިން މިނިސްޓްރީ
ރައީސް ޑރ. މުހައްމަދު މުއިއްޒުގެ ޒައާމަތުގައި ދެ ގައުމު ގުޅިގެން ކުރެވޭ މަސައްކަތްތަކުން ދެ ގައުމުގެ ދެމެދުގައި އިތުރަށް ގުޅުން ބަދަހިވާނެ ކަމަށް އުންމީދުކުރައްވާ ކަމަށް ޖައިޝަންކަރު މިއަދު ވަނީ ވިދާޅުވެފަ އެވެ. މިއަދުގެ ރަސްމިއްޔާތުގައި ރައީސް މުއިއްޒާއި، ރައީސް އޮފީހުގެ އިސްވެރިންނާއި، ކެބިނެޓުގެ ވަޒީރުންގެ އިތުރުން އިންޑިއާ ސަފީރު މުނު މަހާވަރު ވެސް ވަނީ ބައިވެރިވެވަޑައިގެންފަ އެވެ.
ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ މިއަދު ރާއްޖެ ސަރުކާރާ ހަވާލުކުރި މަޝްރޫއުތަކަކީ ދިވެހިންގެ ދިރިއުޅުމުގެ ފެންވަރު ރަނގަޅުކޮށްދޭން އިންޑިއާ ސަރުކާރުން ދިން އެހީއަކަށް ވާތީ އިންޑިއާގެ ބޮޑުވަޒީރު ނަރެންދުރަ މޯދީ އާއި އިންޑިއާ ސަރުކާރަށާއި އެ ގައުމުގެ ރައްޔިތުންނަށް ޝުކުރު އަދާކުރައްވާ ކަމަށެވެ.
އިންޑިއާއާ އެކު އޮތް ޒަމާންވީ ގާތް ގުޅުން ރާއްޖޭގެ ރައްޔިތުން ވަރަށް ބޮޑަށް ބަލައިގަންނަ ކަމަށް ވިދާޅުވެ، ރާއްޖެ އާއި އިންޑިއާއާ ދެމެދު އޮތް އެކުވެރިކަން އިތުރަށް ވަރުގަދަކުރުމަށް އެމަނިކުފާނުގެ ސަރުކާރުން ކުރެވެން އޮތް ހުރިހާ މަސައްކަތެއް ކުރައްވާނެ ކަމަށް ވެސް ވިދާޅުވި އެވެ.
ދެ ގައުމުގެ ރަހުމަތްތެރިކަމަށް އިންޑިއާ އިން ކުރަމުން އަންނަ މަސައްކަތްތަކަށް ވެސް ރައީސް ފާހަގަކުރެއްވި އެވެ.
މިހާރު ރާއްޖެ އަށް ޒިޔާރަތް ކުރައްވަމުން ގެންދަވާ ޖައިޝަންކަރާއި އިދިކޮޅު އެމްޑީޕީގެ އިސްވެރިންނާއި ވެސް މިއަދު ބައްދަލުކުރައްވައިފަ އެވެ. އަދި އޭނާ މާދަމާ ރާއްޖޭގެ ދެކުނުން އައްޑޫ ސިޓީއަށް ޒިޔާރަތް ކުރައްވަން ވަނީ ހަމަޖެހިފަ އެވެ. މި ދަތުރުފުޅުގައި އައްޑޫ ހަންކެޑެ ބްރިޖު މާދަމާ އިފްތިތާހު ކުރުމަށް ވަނީ ނިންމައިފަ އެވެ.
- އިތުރަށް ކިޔާލަން: ޖައިޝަންކަރު އެމްޑީޕީގެ އިސްވެރިންނާއި ބައްދަލު ކުރައްވައިފި
