އެޑިއުކޭޝަން މިނިސްޓްރީން ބުނީ، ސީ.އެޗް.އެސް.އީ އަށް ކުރިމަތިލެވޭނީ އައި.ޖީ.ސީ.އެސް.އީ އިމްތިނުން ޖުމުލަ 5 މާއްދާއިން ދަށްވެގެން ސީ ގްރޭޑް ލިބިގެން ކަމަށާއި، މީގެތެރޭގައި ދިވެހި ބަސް ނުވަތަ އިސްލާމިކް ސްޓަޑީޒް އާއެކު ކޮންމެވެސް 1 ސްޓްރީމެއްގެ މަދުވެގެން 2 މާއްދާ އިން ދަށްވެގެން ސީ ގްރޭޑް ލިބިގެން ކަމަށެވެ.
ފޯމާއި އެކު ހުށަހަޅަންޖެހޭ ތަކެތި:
- ޖީސީއީ، އައިޖީސީއެސްއީ އަދި އެސް.އެސް.ސީ ނަތީޖާގެ ކޮޕީ
- ސްކޫލް ނިންމިކަމުގެ ލިޔުމުގެ ކޮޕީ
- ދިވެހި ރައްޔިތެއްކަން އަންގައިދޭ ކާޑުގެ ކޮޕީ
މާލެ ސަރަހައްދުގައި މަތީ ސާނަވީއަށް ކިޔަވައިދޭ ހަމައެކަނި ސްކޫލު، ސީއެޗްއެސްއީ މިހާތަނަށް ހިންގީ އަމީނިއްޔާ ސްކޫލުގެ ބިއްދޮށުގަ އެވެ. އެކަމަކު، އެ އިމާރާތް ބޭނުންކުރުން މިދިޔަ އޮގަސްޓް މަހު ހުއްޓާލުމަށް ފަހު، ސީއެޗްއެސްއީ ބަދަލުކުރީ ހުޅުމާލޭގައި އަލަށް ހެދި އިމާރާތަށެވެ.
ނަމަވެސް ރައީސް މުއިއްޒުގެ އެޑްމިނިސްޓްރޭޝަން ވަނީ މާލެއަކީ ކެޕިޓަލް ސިޓީއަށްވާއިރު، އެ ތަނުގައި އޭ ލެވެލް އަށް ކިޔަވައިދޭ ސްކޫލެއް ހުންނަން ޖެހޭނެ ކަމަށް ވިދާޅުވެ މާލޭގައި ޒަމާންވަންދެން ހިންގި އޭ ލެވެލް ސްކޫލް، ސީއެޗްއެސްއީ އިމާރާތުގައި އަންނަ ސެޕްޓެމްބަރު މަހު އަލުން އޭ ލެވެލްއަށް ކިޔަވައިދޭން މަރާމާތު ކުރަން ފަށައިފަ އެވެ. އަލުން ކިޔަވައިދޭން ފަށަން ތައްޔާރުވާ އެ ސްކޫލަށް ކިޔަން ނިންމާފައި ވަނީ "ސީއެޗްއެސްއީ މާލެ" އެވެ.
މާލޭގައި މި އިމާރާތުގައި ކިޔަވައިދޭން އަލުން ފެށި ނަމަވެސް ހުޅުމާލޭގައި ވެސް އޭލެވެލް އަށް ކިޔަވައިދޭން މިނިސްޓްރީން ވަނީ ނިންމައިފަ އެވެ.
