އިއްޔެގެ ވަގުތެއްގައި އަނިޔާވެރި އިޒްރޭލުގެ ގައުމީ ސަލާމާތާ ބެހޭ ވަޒީރު، އިޓަމާ ބެންގްވީރުގެ އިސްނެގުމުގެ ދަށުން، ޔަހޫދީންގެ ބައެއް ވަނީ އިސްލާމްދީނުގެ އެންމެ މާތް އެއް މިސްކިތްކަމަށްވާ އަލްއަގްސާ އަށް ގަދަބާރުން އަރައިގަނެފަ އެވެ.
ބެންގްވީރު ވަނީ މިސްކިތުގައި އަޅުކަން ކުރަން ތިބި މީހުންނަށް ފުރައްސާރަ ކުރާ މަންޒަރު ސޯޝަލް މީޑިއާގައި ޕޯސްޓްކޮށްފަ އެވެ.
އިޒްރޭލުގެ ގައުމީ ސަލާމާތާ ބެހޭ ވަޒީރު އިޓަމާ ބެންގްވީރު، އިޒްރާއީލުގެ ނެގެވް އެންޑް ގަލީލީ އެފެޔާޒްގެ މިނިސްޓަރު ޔިޓްޒްހަކް ވަސޭލައުފް އަދި އިޒްރޭލުގެ ނެސެޓް މެމްބަރުންވެސް ބައިވެރިވި މި އަރަިގަތުމަކީ މުސްލިމް އުންމަތުގެ އެންމެ މާތް އެއް ތަނުގެ މުގައްދަސްކަމާ ވަރަށް ބޮޑަށް ހިލާފުވުމެއްކަމަށް ފޮރިން މިނިސްޓްރީން ބުނެ އެވެ.
އިސްރާއީލުން ތަކުރާރުކޮށް އަލް އަގްސާ މިސްކިތަށް ވަދެ، އެ ސަރަހައްދުގައި ސުލްހައާއި ހަމަޖެހުން ހޯދުމުގެ އުންމީދުތަކަށް ހުރަސްއެޅިގެން ދިއުމަކީ ވަރަށް ބޮޑު ކަންބޮޑުވުމެއްކަމަށް ފޮރިން މިނިސްޓްރީން ބުނެ އެވެ.
ފަލަސްތީނުގެ އަހުވަންތަ ރައްޔިތުންނާ އެއްބައިވަންތަކަމާއެކު ރާއްޖޭގެ ސަރުކާރާއި ރައްޔިތުން ތިބެ، ބައިނަލްއަގުވާމީ މުޖުތަމައު ގުޅިގެން އެ މައްސަލައަށް ސުލްހަވެރި އަދި ދެމިއޮންނަ ހައްލެއް ހޯދުމަށް ފޮރިން މިނިސްޓްރީން ނެރުނު ބަޔާނުގައި ވަނީ ތަކުރާރުކޮށް ގޮވާލަފަ އެވެ.
